[A:179b]yin pa'i chos skor sogs gdung brgyud kho na la chig brgyud du bzhugs pa'i gdams pa rnams yongs su rdzogs par gnang bar chos skor 'di dag gi mnga' bdag chen por bzhugs pa ni/ bdag nyid chen po rang gi gsung las/ bod yul bstan pa'i mnga' bdag mchog /sa skya'i rje btsun las brgyud pa'i/ /nag po chen po'i man ngag la/ /nga mkhas zer ba mang na yang / /ji bzhin rtogs pa kho bo tsam/ /zhes gsungs pa 'di nyid kyis rtogs par nus pa yin no/ /des na bdag nyid chen po 'dis 'khor ba'i khyim thab ni 'jigs shing nyam nga ba'i sdug bsngal gyi rtsa bar gzigs nas/ mtho ris dang byang chub bsgrub pas med du mi rung ba'i gzhi chen po lhag pa'i tshul khrims kyi bslab pa kho nar dgongs te/ nges par 'byung ba'i thugs kyi bsam pa ston gyi zla ba ltar dkar zhing dri ma med pas kun nas bslangs te/ dgung lo bdun pa rab myos zhes bya ba lcags pho rta'i lo la byang phyogs shambha la'i rigs ldan grags pa gangs ri'i khrod 'dir ngur smrig gi bla gos kyi rnam par rol pa'i 'jam pa'i dbyangs dkon mchog bzang po zhes mtshan yongs su grags pa'i nges don rgya mtsho'i mnga' bdag chen po de nyid dge sdings bla brang du spyan drangs pa'i drung du khyim pa'i rtags mtha' dag bzhi mdo'i rtswa ltar dor zhing / ngur smrig gi rgyal mtshan sogs rab tu byung ba'i rtags yang dag par bzhes pa'i sgo nas bar ma rab byung du bsgrub ste/ blo gros rgyal mtshan dpal bzang po zhes mtshan gsol/ de nas dam pa de nyid kyi zhabs phyir 'brangs te nyang stod dpal 'khor bde chen gyi chos sde chen