[A:14b]lo tsA ba la gtad do/ /bla ma'i zhal nas khyod pha jo sras kyi bu la slob gnyer byed dgos pa yin/ de la shes rab dgos pas de'i lha 'phags pa 'jam dpal yin zhing / a ra pa tsa na 'di sgrubs gsungs nas bsgrubs pas/ res 'ga' dung gi mi chen po cig yong / res 'ga' seng ge chen po byung ba bla ma la zhus pas/ 'byung po dpe dkar kho bar chad bya 'dod pas/ bar der jo bo mi g.yo ba'i sgom bzlas gyis gsungs nas/ de'i rjes gnang dang chu'i srung ba sgrub thabs yan lag dang bcas pa rdzogs par gnang ste/ de ltar mdzad pas bar chad zhi nas zla ba drug nas 'grub ste 'jam dpal gyis zhal gzigs shing / de'i sgrub khang 'jam dpal brag khung du grags pa bla brang shar gyi dkyil na yod do/ /de ltar 'jam dbyangs kyis mngon sum du zhal bstan nas zhen pa bzhi bral gyi gdams pa stsal zhing / 'jam dbyangs kyi thugs ka nas ral gri mu 'brel ba bdun bla ma nyid kyi thugs kar thim pa'i snang ba bstan pa ni/ gdung brgyud rnams kyang 'jam dbyangs kyi sprul pa sha stag dang / khyad par 'jam dbyangs gdung brgyud 'byon pa'i rten 'brel yin par bshad cing / de ltar yi dam gyi lhas dngos su byin gyis brlabs pas shes bya phal mo che 'bad med du thugs su chud mod kyang / dam pa'i spyod pa dang mthun par bstan pa dang / phyi rabs kyi gang zag rnams kyi bsam ngo dang bstun nas thos pa mdzad pa'i tshul ni/ de nas dgung lo bcu gnyis bzhes pa'i dus su da jo sras 'di slob gnyer cig la gtong dgos pas gang du gtang ba drag gros byas pas/ chos kyi bshad