[A:133b]slob ma'i tshogs sa chen po rdul ltar bgrang ba las 'das pa yin kyang / gtso bor gyur pa ni/ bshad pa'i srol 'dzin shar nub gung gsum la sogs pa'i chen po rnams dang / de nyid kyi sras bla ma grags pa 'od zer dang / bla ma bkra shis dpal dang / ma lo la sogs pa rab tu gyur pa mang po zhig dang / bsgrub pa'i srol 'dzin ni/ spyir bla ma 'di las gdams ngag thob nas nyams len snying po dril nas bsgrub pa'i rgyal mtshan 'dzin pa mang du yod kyang / man ngag yongs su rdzogs shing bum pa gang byo bzhugs pa ni bla ma chen po zhang dkon mchog dpal dang / dge slong kun blo gnyis byung zhes grags pa yin la/ gzhan yang la ru ba/ nyan chen pa/ sru lung pa/ gsal la ba 'od zer 'bum/ dbus pa sangs 'bum la sogs brgyud pa 'dzin nges pa'i bstan 'dzin mang du bskrun nas/ bde bar gshegs pa'i bstan pa spyi dang bye brag thams cad de bzhin gshegs pa bzhugs pa'i dus la 'gran pa bzhin ches cher gsal bar mdzad pa yin no/ /de ltar ngo mtshar ba'i mdzad pa bsam gyis mi khyab pa'i sgo nas bstan 'gro'i don rgya chen po zhig mdzad de/ de nas bdag nyid chen po de sku tshe de nyid kyi gdul bya thams cad smin cing grol bar rang gi mngon par shes pas mkhyen cing / sku'i bkod pa gzhan gyi sems can gyi don rgya chen po mdzad pa'i dus la babs par gzigs nas/ slob dpon chen po dharmA pha la rakShi ta la bla ma sa skya pa chen po'i rnam par thar pa la sogs pa gsungs nas/ bla ma dam pa de rnams la yon tan gyi phung po de lta bu mnga' zhing / bstan pa'i bya ba de