[A:129b]spyan ma btsums par mnal du song 'dug pa bstan te/ 'di 'od gsal zin pa'i rtags lags/ spyir nged kyi mi brgyud rnal ma la 'od gsal cung zad re rgyun mi chad yod pa yin zhes gsungs pa dang / yang rgya gar gyi paNDi ta go taM bhi dra la mtshan mo rmi lam ji ltar byung ba thams cad bdag nyid chen po 'di'i mngon par shes pas mkhyen nas/ nang par paNDi ta la ji lta ba bzhin gsungs pas/ paNDi ta shin tu ngo mtshar bar gyur nas/ mahA gu ru la mngon par shes pa a tshe zhes zer zhing shin tu dad par gyur ces kyang grags so/ /gzhan yang bla ma 'di gong nas phebs/ 'u yug na bzhugs dus su phyogs su khral sdud byung ba la/ shangs lha bu ba'i jo gdan cig gis zhu ba la phyin pas/ sgar gyi mthar sems can la 'tshe ba byed pa hor sog mang pos mtha' bskor/ bla ma 'di 'ja' li gcig la bzhugs/ g.yas na rtsom pa mdzad pa'i yig mkhan/ g.yon na bka' shog 'dri mkhan/ mdun na rgyun gtor bshams nas gtor skad bton/ chab gtong ba mthong bas/ jo gdan gyi bsam pa la/ bla ma ci'i bla ma/ sems can la 'tshe ba mtha' hor sog gis bskor/ g.yon gyi bka' shog 'di nga zhu ba la yong ba dang 'dra gzhan sner ba yin/ g.yas kyi rtsom pas ci byed chos sems thog tu mi 'jog tshig gcig mi bsngo ba'i gtor skad kyis ci byed bla mar mi 'dug snyam pa cig byung ba dang / bdag nyid chen pos jo gdan la spyan cher gzigs nas/ gtor ma 'di bshams pas thob pa de khos bshams pa yin/ dmigs pas thob pa de ngas byed/ bsngos pas thob pa de khyod kyis byin