[A:129a]khrims kyi bslab pa'i sgo nas kyang 'gro ba mang po'i don mdzad de/ snga phyir rang nyid kyi dge slong pha ma dang / dge tshul pha ma stong bzhi brgya nyi shu rtsa lnga'i mkhan po mdzad cing / gzhan yang nyid kyi slob ma 'dul 'dzin chos kyi mgon po zhes bya bas kyang lo gcig gi khongs su brgya'i dge slong dang / dge tshul dgu brgya dang bzhi bcu rtsa bdun gyi mkhan po byas te/ de rnams las brgyud pa'i rab tu byung ba mang po 'phel te phyogs thams cad khyab par gyur to/ /gzhan yang ting nge 'dzin gyi bslab pa'i yon tan yang phyi rol du mkhas pa'i bya ba rgyun mi chad pa mdzad kyang / nang du ting nge 'dzin la g.yel ba cung zad kyang mi mnga' bas yi dam gyi lhas zhal gzigs pa dang / 'od gsal rgyun mi chad pa la sogs pa dang / mngon par shes pa thogs pa med par mnga' ba la sogs pa yon tan dpag tu med pa mnga' ba ste/ de yang skyid grong du jo bo'i drung du byon pa'i tshe/ mnal lam du rje btsun spyan ras gzigs kyi zhal gzigs pa la mnal lam du bstod pa yang mdzad cing / yang chos rje pa hor yul la phebs pa'i lam du chos rje'i dngos slob rje yang dgon pa dang mjal te/ de na re/ bla ma ni hor yul du gshegs par gda'/ bdag cag slob ma rnams la phyag dang bsnyen bkur byed pa dang / mos gus kyi gnas su gyur pa'i sku tshab gcig 'tshal dgos par gda' ba la/ dbon po 'di dag yang dag pa lags sam zhus pas/ chos rje pas dbon po 'di dag rnal ma lags gsungs nas/ bla ma 'di pha chad zhig na rbod gcig 'dug pa la bsnyel nas