[A:130a]gsungs pa dang / jo gdan shin tu skrag nas/ mngon shes thogs med du mnga' bar 'dug pa la ngas log lta byas pa ma legs snyam nas/ lus thams cad sa la phab pa'i phyag byas bshags pa phul mchog tu ngo mtshar bar gyur te/ bstod tshig gi sgra dbyangs phyogs kun du sgrog par gyur/ bla ma'i mdzad spyod gang la gang 'dul du rtogs/ sems can gsod gcod/ khral 'u lag sogs rang gi las su go nas nges pa'i shes pa khyad par can skyes par gyur to/ /de dag la sogs pa rgyu mtshan du ma'i sgo nas mngon par shes pa rgya chen po mnga' bar spyod pa dang ldan pa'i skye bo thams cad la yongs su grags pa yin zhing / de ltar skyes bu dam pa 'di ni mngon par shes pa thogs med du mnga' ba la sogs pa yon tan du ma dang ldan pas bstan bcos rtsom pa la sogs pa bstan pa'i bya ba gang la'ang chags thogs med pas/ sngon gyi slob dpon chen po 'phags pa klu sgrub la sogs pa'i rnam thar dang tshul mtshungs pa yin la/ legs bshad gsar du mdzad pa yang dngos dang brgyud pa'i don du tshig brjod bde zhing rtogs par sla ba'i bstan bcos dang / springs yig dang / gdams pa'i skor bsam gyis mi khyab pa zhig mdzad de/ 'di ltar bstod pa dang gsol 'debs kyi skor la/ lam 'bras bla ma brgyud pa'i gsol 'debs/ rgyud kyi bla ma brgyud pa'i gsol 'debs/ 'jigs byed brgyud pa'i gsol 'debs/ ba ri brgyud pa'i gsol 'debs/ bla ma'i mtshan 'bum/ sku'i spyod pa la spel ba che chung gnyis/ bla ma'i spyi bstod me tog gi