[A:124a]bla ma 'di'i gong du phebs pa'i lam bar rnams su yang skal ldan gyi gdul bya dpag tu med pa smin grol la bkod nas/ de nas bdag nyid chen po 'di'i nyi ma'i dkyil 'khor 'od zer gyi dra bas bskor ba'am/ bsil zer byed rgyu skar gyi tshogs kyis bskor ba'am/ de bzhin gshegs pa nyan thos kyi dge 'dun la sogs pa'i slob tshogs kyis bskor ba ltar slob ma'i tshogs rgya chen po dang bcas te sa'i bdag po chen po bzhugs pa'i gnas/ bod kyi yul nas dpag tshad brgya phrag mang po'i lam shin tu bgrod dka' ba'i chu bo du ma dang / thang dang / ri rgyud du ma dang / zam pa dang / 'phrang la sogs pa du ma las brgal te rim gyis nyi 'og gi rgyal khams rnams su byon par gyur to/ /'di ni byang chub sems dpa' rnams kyi rnam par thar pa ste/ bcom ldan 'das kyis mdo las/ byang chub sems dpa' dag gis ni dpag tshad brgya'i pha rol dag tu yang / sems can rnams la dam pa'i chos ston du 'gro zhes gsungs pa ltar yin no/ /de'i tshe rgyal po chen po'i rgyal tshab dam pa sras kyi thu bo jim gyim zhes bya ba dang / btsun mo dang / blon po'i tshogs rgya chen po dang bcas pa thams cad kyis rgya gar gyi glang po che la rin po che'i dra bas spras pa'i khri dang / rin po che za ra tshags mngon par 'phyar ba'i gdugs dang rgyal mtshan dang / ba dan dang / rol mo'i tshogs rgya chen po du ma dang bcas pas bsu ba dang / mchod pa rgya chen pos pho brang chen por gdan drangs nas zab pa dang rgya che ba'i chos tshul du ma zhus shing sangs rgyas kyi bstan pa ku mudda'i