[A:118b]lags mod gsungs/ yang dge bshes stong lung pa kun bla ma 'das mchod mi thob pa la 'das mchod byas na bla ma nyid la gnod/ nyes dmigs chen po yod gsung yin bka' stsal mang po gsungs skad de ji ltar mchi zhus pas/ de dngos grub zhu ba'i tshul gyis mchod pa 'bul ba dang / dge gtong gi tshul gyis 'bul ba gnyis yin/ dngos grub zhu ba'i tshul gyis 'das mchod byed pa la bla ma tshad ldan gcig la byed pa yin/ dge gtong gi tshul gyis byed pa la tshad ldan mi dgos/ pha dang ma la'ang byar btub phan yon 'byung gsungs/ shes pa'i spring yig las/ ji ltar bde gshegs sku gzugs shing las kyang / /bgyis pa ci 'dra yang rung mkhas pas mchod/ /bgyi ba ci 'dra yang rung / de ci 'dra ba gcig la 'bru gnon zhus pas/ de rten la brnyas pa spong ba'i tshig yin/ rgyu ngan pa dmigs kyis bsal ba yin pas/ bzo legs rung nyes rung / rgyu bzang rung ngan rung / rab gnas yod rung med rung mkhas pa'i skye bo gcig yin phan chad de mchod rang dgos/ shugs la mi mkhas pa'i skye bo la gtad pa med bya ba yin gsungs/ 'on kyang / rab gnas ma byas lha rnams la/ /phyag dang mchod pa 'bras bu med/ /bya ba gsungs nas gda' ba de ji ltar lags zhus pas/ de blo shin tu dman pa la dgongs nas gsungs pa yin nges don min gsungs/ yang mdo khams kyi lha rigs drug po 'di thogs bcas kyi gzugs su gda' ba la/ shi tsa na ro mi yong ba ji ltar lags zhus pas/ de da lta mi lus shin tu bzang ba sgang la bzhag pa cig yin