[A:91a]blon po sogs kyis 'khor gyi nang du gsungs pa'i rkyen byas/ btsun mo cha bu des bla ma de nyid la mi phyed pa'i dad pa dang / sa skya pa'i bstan pa la gus zhen gzhan las mchog tu che ba zhig yod 'dug pas 'phags pa rin po che'i spyan sngar byon te/ sngar gyi rgyal blon rnams kyi gnas tshul rnams snyan du gsol nas/ bla mas kyang dad pa chen po'i gzhi mi 'gyur ba'i rdzu 'phrul ma bstan na/ rgyal po'i re ba yang mi khengs shing thugs la 'gyur ba yang byung dogs 'dug ces gsol ba btab pas/ chos kyi rgyal po'i zhal snga nas/ pakShi chen po rdzu 'phrul spyir gdul bya dus la babs pa dang / lhag par khong gi rdzu 'phrul yang don la nged kyi yin/ 'on kyang rgyal po dad pa dang dam tshig can gyi sems kyi re ba ma khengs na mi nyan zhing / rdo rje theg pa'i gzhung las kyang nyes pa che bar bshad pas na/ nged kyis kyang de lta bu'i rdzu 'phrul bstan chog pas/ btsun mo rang ral gri rnon po cig khyer shog gsungs nas/ gri phul bas/ nged kyi yan lag rnams rgyal ba rigs lngar byin gyis rlobs pas/ khyed rang rgyal blon rnams kyang rigs lnga'i zhing khams gang mos su skye bar gsol ba thob dang yid ches pa'i phyir du gzims khri'i nang na yang lus ril bur yod pas/ de la mjal ba mdzod gsungs pa'i bka' gnang ste/ de bzhin du dbu rnam par snang mdzad/ phyag zhabs bzhi rigs bzhir byin gyis brlabs te rgyal ba rigs lnga la/ rgyal po btsun mo blon po'i bka' 'khor dang bcas pas lus kyis phyag dang bskor ba/ yid kyis smon lam gya nom pa btab ste