[A:90a]lugs gcig la chos kyi rje sa skya paNDi ta la rgyal po go dan gyis phul/ sa paN gyis 'phags pa la gnang bar bshad pa'i lugs gcig kyang 'dug cing / gang ltar sa paN gyi chos dung kyang yin te/ hor gyi yul skad rigs mi gcig pa'i rgyal khams du ma sangs rgyas kyi bstan pas khyab par mdzad cing / chos 'khor bsam gyis mi khyab pa bskor ba'i dus kyi chos dung yin par gsungs pas so/ /de lta bu'i yang dag par rdzogs pa'i sangs rgyas kyi chos dung khyad par du 'phags pa 'di ni dpal ldan sa skya nyid du 'gro ba'i mgon po chos rgyal 'phags pa rgya nag nas phebs dus bsnams nas 'gro ba ma lus pa'i skyabs mgon dam par bzhugs su gsol ba yin no/ /chos dung 'di lta bu'i che ba'i yon tan ni zhib par brjod kyis ga la lang / rags pa tsam brjod na/ gdul bya snod ldan gyis bltas pa de'i tshe 'di nyid la rnam bcu dbang ldan la sogs pa khyad par du 'phags pa'i rang byon bsam gyis mi khyab pa yod cing / 'di'i gsung thos pa tsam gyis bskal pa bye ba dpag tu med pa nas bsags pa'i sdig sgrib 'dag cing / ngan song du skye ba'i sgo bkag ste/ mtho ris dang thar pa'i bde ba la 'god par mdzad cing / gzhan yang sems can la bde skyid 'byung ba'i 'bru'i tshogs rnams la sde brgyad gdug pa can rnams kyis mtho 'tshams pa'i ser ba la sogs pa byung tshe/ 'di'i gsung thos pa tsam gyis de ma thag tu rang zhi la 'gro ba dang / sa'i bcud 'phel te sems can la bde skyid phun sum tshogs pa 'byung ba yin no/ /bar skabs su sngags