[A:86a]dbang du 'du ba 'dug pas bsam bzhin skye ba blang dgos zer nas de bzhin mdzad pa yin la/ de nas re zhig na chos rje'i chag phyir skyid grong du byon pa'i tshe glang ri pa'i dge 'dun rnams kyis mjal ba dang / btsun pa bgres po cig la nga'i nye gnas bkra shis don grub byung gsungs pas/ des kyang bla mar shes zhabs la 'jus te mchi ma phyung ngo zhes grags so/ /de nas dgung lo gsum pa la sgrub thabs mtsho skyes la sogs pa thugs las gsungs pas kun gyis ya mtshan du 'dzin te 'di ni nges par 'phags pa'o zhes phyogs kun tu grags pas de phyin chad 'phags pa zhes mtshan yongs su grags so/ /brgyad pa la skyes rabs thugs las gsungs/ dgu pa la chos rje pa'i sngon 'gro'i chos 'khor mdzad dus brtag gnyis gsungs/ tshogs kyi gtam bshad mdzad pas thams cad ngo mtshar te mkhas pa thams cad kyi nga rgyal bcag cing snyan pas khyab par mdzad par gyur to/ /bcu pa la rje'i chag phyir byang ngos su byon pa'i lam du dbus su chos rje pas mkhan po zul phu ba'i na bza' 'phred gsol gyi slob dpon mdzad nas rab tu byung / skyor mo lung pa'i mkhan po shes rab sengge la dge tshul gyi bslab bya gsan/ de nas bcu bdun pa la chos rje pa la mnga' ba'i yon tan thams cad rdzogs pas chos rje pa thugs shin tu mnyes te/ bstan pa'i khur bzod par dgongs nas chos dung dang lhung bzed la sogs pa gnang / slob ma'i tshogs rnams gtad nas bstan pa'i bya ba dang sems can mang po'i don bya ba'i dus la babs pas sngon gyi dam bcas pa dran