[A:55b]thams cad kyi de kho na nyid du thugs su chud pa yang sa dang po mthong ba'i lam thob nas 'byung ba yin la/ chos kyi don du srog gtong ba yang sa dang po mthong ba'i lam la gnas pa phyir mi ldog pa'i rtags su gsungs te/ mngon par rtogs pa'i rgyan las/ chos ni rdul tsam mi dmigs dang / /rang gi sa la nges pa nyid/ /sa gsum la ni gnas pa dang / /chos kyi don du srog gtong ba/ /de 'dra'i skad cig bcu drug ni/ /blo ldan mthong ba'i lam gnas kyi/ /phyir mi ldog pa'i rtags dag yin/ /zhes dang / de'i 'grel par/ sbyin pa la sogs pa'i khyad par rtogs pas ser sna dang 'chal pa'i tshul khrims la sogs pa la sbyor ba dang / rjes su sbyor ba'i gnas pa so sor bkag pa dang / chos thams cad rnam par thar pa sgo gsum gyi ngo bo nyid yin pas rtogs pa'i chos rdul tsam yang mi dmigs pa dang / mngon par yid ches pa thob pas thams cad mkhyen pa nyid gsum gyi bdag nyid kyi rang gi sa la ji lta ba bzhin du nges pa nyid kyi gnas pa dang / gcig tu gzhol ba nyid kyi rnam pa thams cad mkhyen pa nyid la sogs pa'i chos kyi don du srog gtong ba zhes bya ba bzhi ni lam gyi rnam pa yin te/ de ltar na bzod pa dang shes pa'i skad cig ma rnam pa bcu drug gis bsdus pa 'di rnams yang dag par thob pas na dag pa 'jig rten par bzung ba dang / 'dzin pa mngon par ma zhen pa'i rnam pa can rjes kyi sems kyis bsdus pas rang dang mthun pa'i 'bras bu gzugs la sogs pa'i 'du shes bzlog pa la sogs pa bskyed pa'i phyir/ byang chub sems dpa' mthong ba'i lam la gnas