[A:༢༢༩ན]བརྒྱུད་པ་དྲི་མ་མེད་པ་ལས་འོངས་པའི་སྡོམ་པ་གསུམ་གྱི་བཀའ་དྲིན་མནོས་པའི་བླ་མ་རྣམས་ཀྱི་ནང་ནས་ཀྱང་། འདི་ཉིད་ལ་རྩ་བའི་བླ་མ་མཆོག་ཏུ་འཛིན་པ་ཡིན་ཏེ། ཉིད་ཀྱི་གསུང་ལས་ཀྱང་། ཁྱད་པར་རྡོ་རྗེ་འཆང་ཆེན་རཏྣའི་མཚན། སྙིགས་དུས་འགྲོ་བའི་འདྲེན་མཆོག་དམ་པ་ལས། །སྡོམ་པ་གསུམ་གྱི་བཀའ་དྲིན་ཉེར་ནོས་པས། །བཀའ་དྲིན་ཆེ་ཞིང་བླ་མའི་མཆོག་ཏུ་བཟུང་། །ཞེས་གསུངས་པས་སོ། །ཡང་བདག་ཉིད་ཆེན་པོ་འདིས་མཁན་ཆེན་བསོད་ནམས་ལྷུན་གྲུབ་ལས་དམ་པའི་ཆོས་གསན་པའི་ཚུལ་ནི། བདག་ཉིད་ཆེན་པོ་རང་གི་གསུང་ལས། མཁན་ཆེན་འཇམ་པའི་དབྱངས་ལས་ཆེས་ཟབ་པའི། །ཀྱེ་རྡོར་རྒྱུད་གསུམ་གསང་མཐའ་གུར་མགོན་སོགས། །ཐུན་མོང་མ་ཡིན་ཡིད་ཆེས་གནད་རྣམས་ཞུས། །ཞེས་གསུངས་པ་ལྟར། བྱ་བ་སྤྱི་རྒྱུད་ནས་བཤད་པའི་རིགས་གསུམ་སྤྱི་དབང་། རྣམ་འཇོམས་མ་ཎི་བཛྲ་ལུགས་ཀྱི་དབང་སོགས་སྨིན་བྱེད་དབང་གི་རྣམ་གཞག་བཅུ་ཕྲག་གསུམ་དུ་ལྔ་ཕྲག་གཅིག་གིས་ལྷག་པ་རྣམས་དང་། དཔྱལ་ལུགས་ཀྱི་ཕག་མོ་སྐོར་གསུམ་གྱི་བྱིན་རླབས་སོགས་བྱིན་རླབས་ཀྱི་རིགས་ལྔ་ཕྲག་གསུམ་ཙམ་དང་། གཙུག་ཏོར་རྣམ་རྒྱལ། དོན་ཞགས་ལྷ་ལྔ། གུར་མགོན་ལྷ་བརྒྱད་ཀྱི་རྗེས་གནང་སོགས་རྗེས་གནང་ཟུར་བཀའ་བཞི་བཅུ་ལྷག་པ་ཙམ་སོགས་འདི་དག་ཀྱང་རྒྱབ་བརྟེན་གྱི་ཡིག་ཆ་སོ་སོའི་ལུང་དང་། གཞན་ཡང་དགེས་པ་རྡོ་རྗེ་རྒྱུད་གསུམ་གྱི་བཤད་བཀའ་བདེ་མཆོག་རྩ་རྒྱུད་འགྲེལ་པ་དང་བཅས་པའི་ལུང་བཤད་སོགས་དང་། ཆོས་རྗེ་མཁན་ཆེན་ཐམས་ཅད་མཁྱེན་པ་རང་ཉིད་ཀྱི་བཀའ་འབུམ་གྱི་ལུང་སོགས་མཆོག་ཏུ་