[A:༥༢བ]གི་རྣམ་པར་ཐར་པ་ཅུང་ཟད་བཤད་པ་འདི་དག་ཀྱང་རྒྱ་གར་གྱི་པཎྜི་ཏ་ཤེས་བྱ་རིག་པའི་གནས་ལྔ་ཡོངས་སུ་རྫོགས་པ་རྣམས་དང་། བོད་ཀྱིའང་གཞུང་དང་དོན་གྱི་ཆ་ལེགས་པར་དཔྱིས་ཕྱིན་པར་ཤེས་ཤིང་། ཤེས་བྱ་ཐམས་ཅད་ལ་ཤེས་རབ་འཇུག་པ་ལ་འབེལ་བའི་གཏམ་ལ་ཀུན་ནས་དགའ་བ། བདག་ལ་ཡུན་རིང་དུ་བརྩད་ཅིང་དྲིས་པ་གཟུ་བོར་གནས་པ་དེ་དག་གིས་བདག་གི་རང་བཞིན་ཤེས་པར་ཟད་ཀྱི། རང་གི་བློ་ལ་ཁྱབ་པ་བསྒྲུབས་ནས་ཕྱོགས་ཀྱི་ཆོས་གཞན་གྱི་ཤེས་རབ་ལ་སྦྱོར་བའི་བླུན་པོ་དེ་དག་གམ། སྒྲའི་སྦྱོར་བ་ཕྱོགས་རེ་ཙམ་དྲིས་པའམ། ཚད་མའི་སྦྱོར་བའི་སྐོར་འགའ་རེ་ཙམ་ལ་བརྩད་པའམ། ལུང་དང་མན་ངག་གི་གནད་འགའ་རེ་ཙམ་ལ་དྲིས་གཏུགས་ཅུང་ཟད་བྱས་པ་ཙམ་གྱིས་བདག་གི་ཡོན་ཏན་གྱི་མཐའ་རྟོགས་པར་དཀའོ་ཞེས་གསུངས་ཤིང་། དཔེའི་སྒོ་ནས་ཀྱང་བསྔགས་པ་བརྗོད་པ་ནི། ཤེས་བྱའི་མཁའ་ལ་ཐོགས་པ་མེད་རྒྱུ་ཞིང་། །ཕས་རྒོལ་ཉི་ཟླའི་གཟི་བརྗིད་བཟའ་ནུས་ཀྱང་། །རྟག་ཏུ་སྐྱེ་བོ་ཀུན་གྱིས་མ་མཐོང་བས། །ཀུན་དགའ་རྒྱལ་མཚན་ནམ་མཁའི་སྒྲ་གཅན་འདྲ། །ཞེས་གསུངས་སོ། །རྣམ་པར་ཐར་པ་འདི་ལྟ་བུ་རྣམས་ཀྱང་ང་རྒྱལ་གྱི་སྒོ་ནས་གཞན་ལ་ཟུར་ཟ་བ་མ་ཡིན་གྱི། སྔོན་གྱི་མཁས་པ་ཆེན་པོ་རྣམས་ཀྱིས་ཀྱང་དགོས་པ་དང་བཅས་ཏེ་གསུངས་སོ་ཞེས་སྟོན་པ་ནི་སྔོན་གྱི་མཁས་པ་ཆེན་པོ་དཔལ་ལྡན་ཆོས་ཀྱི་གྲགས་པ་དང་། བློ་གྲོས་བརྟན་པ་དང་། ཤེས་རབ་འབྱུང་གནས་སྦས་པ་དང་། ཤཾ་ཀ་ར་ནནྡ་དང་། སྨྲ་བའི་སེང་གེ་ལ་སོགས་པ་མཁས་པ་ཆེན་པོ་བྱོན་ཟིན་པ་དེ་དག་ལ་ང་རྒྱལ་མི་མངའ་བར་ཟིན་ཡང་། རང་རང་གི་རྣམ་པར་ཐར་པ་བཤད