[A:44]མེད་པར་བྱང་ཆུབ་ཚུལ༎
རིག་གནས་མཁྱེན་པའི་རོལ་རྩེད་བྲོ་གར་རྩེ༎
སྤུ་མདོག་མིང་དུ་རིགས་གཅིག་ནཻ་ཙོའི་ཁྱུ༎
སྨྲ་ཤེས་བརྗོད་པས་མཚོན་ཞིང་བཀུར་འོས་ལྟར༎
རང་རང་ཆེ་འཛིན་བྱུང་རྒྱལ་མི་སྒྲོགས་ཀྱང༎
མཁས་པར་མཚོན་པའི་སྨྲ་མཁས་ཁྱོད་ལས་སུ༎
པཎ་ཆེན་མིང་བཞག་སྒྲ་མདོ་ཀློག་མི་ཕྱེད༎
ཀུན་མཁྱེན་མཚན་སྒྲོག་ཐ་སྙད་གཞུང་ལ་རྨོངས༎
ཐམས་ཅད་མཁྱེན་པ་ཚིག་གིས་དབུལ་གྱུར་པའི༎
གངས་རིའི་ལྗོངས་ཀྱི་དཔྱོད་ལྡན་འདི་འདྲ་མཚར༎
མིང་ལ་དགའ་འཛིན་རང་ཉམས་ཕལ་པའི་སྲོལ༎
རང་བསྟོད་ངོ་འཇོའི་ཕྱེ་འཐོར་བླུན་པོའི་གཤིས༎
བློ་གསལ་བྱེ་བས་དཔོགས་པར་མ་ནུས་ཚེ༎
མཁས་པ་མཁས་པའི་གྲངས་སུ་རིང་ནས་བསྔགས༎
རྒྱ་གར་ཡུལ་དབུས་དྲེགས་ལྡན་རབ་བཀྲམ་གྱིས༎
གང་གི་བློ་གྲོས་གཞལ་བའི་ཡུལ་མིན་ལ༎
མ་སྦྱངས་ཡུས་ཀྱིས་བརྒྱལ་བའི་བོད་ཡུལ་འདིར༎
རྒྱུ་སྐར་དབུས་ན་ཟླ་འོད་བཞིན་དུ་གསལ༎
ཞེས་པཎྜི་ཏ་ཆེན་པོ་ཤཱཀྱ་མཆོག་ལྡན་དྲི་མེད་ལེགས་པའི་བློ་གྲོས་ཀྱི་རྣམ་པར་ཐར་པ་ཞིབ་མོ་རྣམ་པར་འབྱེད་པ་ལས། རིག་པའི་གནས་ལ་སྦྱངས་ཚུལ་བསྟན་པའི་སྐབས་ལས་རྗེས་སུ་བསྒྲགས་པའི་རབ་ཏུ་བྱེད་པ་བདུན་པའོ༎
Chapter 8: sngags gzhung rgya mtsho'i gnas la sbyangs pa'i skabs
དེའི་ཕྱི་ལོ་ཤར་པ་པཎ་ཆེན་རིན་པོ་ཆེ་ཉིད་དགུང་ལོ་ཉེར་གཉིས་སུ་ཕེབས་པས་ས་མོ་སྦྲུལ་གྱི་ལོ། ན་ནིང་གི་ཞལ་བཞེས་སྐུལ་བྱེད་འཕྲང་ཕུའི་དཔྱིད་ཆོས་སྟེང་ནས་འཕྲལ་གྱི་དགོས་ཆ་ཆིབས་ཀྱི་ཕྱག་ཕྱི་སོགས་འཕྲང་ཕུ་ནས་བསྒྲུབས། འཕྲང་ཕུ་བའི་ཀུན་སྤངས་བསོད་ནམས་བཟང་པོ་བའི་དྲུང་ཡང་དབང་ཞུ་བ་ལ་ལྷན་ཅིག་ཕེབས་ནས། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་དཔལ་བཟང་པོས་བྱིན་གྱིས་བརླབས་པའི་གནས་སྙེ་ཐང་ཆོས་རྫོང་དུ། པཎ་ཆེན་བློ་བརྟན་བཞི་པའི་དྲུང་དུ་བསྙགས་ནས་གསོལ་བ་བཏབ་པས་སྔར་ཞལ་གྱིས་བཞེས་པ་ལྟར། བཅོམ་ལྡན་འདས་རྡོ་