[A:42]ཆེ་དགུང་ལོ་ཉེར་གཅིག་ཏུ་ཕེབས་པ་ས་ཕོ་འབྲུག་ལོའི་དཔྱིད་མཚམས་སུ་ཡང་སྔར་བཞིན་པཎ་ཆེན་བློ་བརྟན་བཞི་པ་ཡབ་སྲས་དྲུང་དུ་བསྙེན་ནས། སྒྲའི་ས་རིས་ཀྱི་ཞབས་དང། པཎ་ཆེན་པ་ཉིད་ཀྱིས་དེ་ལོ་རང་མཛད་པའི། བདག་ཉིད་ཆེན་པོ་ས་སྐྱ་པཎྜི་ཏའི་མངོན་བརྗོད་ཚིགཆིག་གཏེར་གྱི་འགྲེལ་བ་དེའི་ལུང་རང་རེས་ཐོག་མར་ཐོབ་པ་དེའི་ཞབས་ན།
སྐྱེ་བའི་ཆུ་གཏེར་སྡུག་བསྔལ་རླབས་ཕྲེང་ཅན༎
ཉེས་མང་ཆུ་སྲིན་བརྒྱ་ཡིས་གང་མཐོང་ནས༎
མཁས་པ་སུ་ཞིག་ཐ་སྙད་ལྷུར་ལེན་གྱིས༎
རང་གི་སེམས་ནི་ཞི་ལ་སྦྱོར་མི་བྱེད༎
གསུང་བ་འདི་ཐོས་དུས་རང་རེ་ལ་ངེས་པར་འབྱུང་བའི་བློ་དཔག་པར་དཀའ་བ་ཞིག་སྐྱེས་ནས། དེར་ཁམས་འདུའི་རྣམ་པ་ཞིག་བྱུང་བའི་རྒྱུ་མཚན་དྲུང་ལོ་ཙ་བ་ལ་བརྒྱུད་ཕུལ་བས། པཎ་ཆེན་བློ་བརྟན་པ་དངོས་ཀྱི་བཀའ་ལུང་ལ་སྒྲ་པ་ཚེ་ཐུང་སྒྲ་པ་སྒོ་དབུལ་ཟེར་བར་གྲགས་ཤིང། རང་རེ་ལ་འཇམ་རལ་གྱིས་གཤིན་རྗེ་གཤེད་འདི་གནང། འདི་ལ་བཟླས་བརྗོད་མང་དག་སོང་བས་ཚེ་མཐར་ཕྱིན་པ་བྱུང། སྤྱིར་བུ་སྟོན་རིན་པོ་ཆེས་མཁན་ཆེན་ཐར་པ་ལོ་ཙ་བའི་དྲུང་དུ་སྒྲ་གསན་དུས་ཀྱང་རྩུབ་འགྱུར་ཆེན་པོ་བྱུང་སྐད། ཁྱོད་ལ་རྡོ་རྗེ་འཇིགས་བྱེད་ཀྱི་དབང་ཅིག་བསྐུར་དགོས་ཀྱང། འདི་རང་རེའི་ཡིད་དམ་དང་ལྷག་པའི་ལྷའི་གཙོ་བོ་ཡིན་པས་ལོ་རེ་ལ་ལན་རེ་ལས་མི་བྱེད་ཡོད་པ། ད་ལོའི་དེ་བྱས་ཟིན་པས་སང་ཕོད་ཡོང་ངེས་བྱེད། ད་ལན་ཐེག་ཆེན་ཆོས་ཀྱི་རྒྱལ་པོ་ལས་དངོས་ཀྱིས་ཐོབ་པ་ཡིན་གསུང། ཡེ་ཤེས་མགོན་པོའི་གཏོར་དབང་བར་ཆད་ཀུན་སེལ་གནང།
དེར་དབྱར་ཆོས་གྲོལ་འཕྲལ་གྲྭ་པ་བྱིན?བྱིང་དང་མ་བསྒྲིགས་པར་རང་རེས་སྔ་མྱུར་རང་འཕན་ཡུལ་ལ་ཕྱིན། ནཱ་ལེནྡྲར་རོང་སྟོན་ཆེན་པོའི་ཞབས་དྲུང་དུ། བདག་ད་ལོ་ཡིད་འབྱུང་ཞིག་ལ་བརྟེན་པའི་ཁམས་མ་སྙོམས་པ་དང། རྨི་ལྟས་ཀྱང་རྩུབ་པ་ཙམ་བྱུང་བས་ཚེ་བསྒྲུབ་ཅིག་གནང་བ་དང། ཐུགས་དམ་ཀྱི་སྐྱབས་འོག་ཏུ་འཇུག་པ་གནང་དགོས་ཞུས་པས། དེ་