[A:227]ཐག་བྱེད་ཐལ་ངག་དབང་པོའི་རྡོ་རྗེ་འབར༎
བྱམས་པའི་ཆོས་ལྔའི་ངེས་དོན་རབ་གསལ་བྱམས་ཆོས་ལམ་གྱི་བང་རིམ་ལས༎
ཉེ་བར་འཛེགས་ནས་བརྒྱུད་པའི་བསྟི་གནས་དགའ་ལྡན་བགྲོད་པའི་ལམ་སྒོ་ཕྱེ༎
དབུ་མའི་བྱུང་ཚུལ་ཡིད་བཞིན་ལྷུན་པོ་རྩ་འཇུག་ཊཱི་ཀ་ལྟ་ཁྲིད་གཉིས༎
ལུགས་གཉིས་རྣམ་འབྱེད་དབུ་མའི་ངེས་གསང་གསལ་བར་འཆར་བྱེད་སྟོང་མཐུན་གཉིས༎
གཞན་གཞུང་ནོར་བ་གྲངས་སུ་བགྲང་བྱས་དངོས་གནས་གསལ་བ་སྒོ་བརྒྱ་པ༎
ངེས་དོན་བདུད་རྩིའི་ཐིགས་པ་མཆོག་དེ་ཚངས་དབྱངས་འཁོར་ལོ་ཕྱོགས་བཅུར་སྒྲོག།
ཉི་ཟླའི་ཤིང་རྟས་ལེགས་པར་དྲངས་པའི་བསླབ་གནས་འཆད་བྱེད་རྒྱས་བསྡུས་དག།
གཞི་གསུམ་ཕྱག་བཞེས་བདུད་རྩིའི་གསོས་ཀྱིས་འདུལ་བའི་བསྟན་པའི་སྲོག་ནས་བཟུང༎
རྣལ་འབྱོར་སྤྱོད་གཞུང་རྒྱ་མཚོའི་རླབས་འཕྲེང་བྱེ་བྲག་བཤད་པའི་རྒྱ་མཚོར་འཁྱིལ༎
སྡོམ་གསུམ་ངེས་གནས་གསལ་བྱེད་སྒྲོན་མེས་དཔྱོད་ལྡན་མིག་གི་དགའ་སྟོན་སྤེལ༎
ཞེས་ཟུར་གྱིས་མཚན་སྨོས་པའི་ཕར་ཕྱིན་ཐེག་པ་དང་རྗེས་འབྲེལ་ཤོག་བུ་མདའ་ཚད་བཞུགས་ལྔ་བརྒྱ་མའི་གླེགས་བམ་བཅུ་གཉིས། མདོ་སྔགས་སྤེལ་མའི་དབུས་པ་གདོང་འདོན་པོད་གྲངས་བཞི། བསྟོད་ཚོགས་ཆབ་ཤོག་ལ་ས་སྐྱ་གྲས་ཀྱི་པོ་ཏི་གཉིས་ཏེ་པོད་གྲངས་བཅོ་བརྒྱད་པོ་གཏིང་སྐྱེས་ཆོས་རྗེ་སྐུ་མཆེད་རྣམ་པ་གསུམ་གྱིས་རེ་རེ་ཕྱག་བཞེངས་གནང་ཞིང་བདག་གིར་གནང་བ་ནི་བཀའ་དྲིན་ཟླ་མེད་པའི་བསྟན་པའི་ཁུར་བསྣམས་པར་སྣང་ཞིང། བདག་གིས་ཀྱང་འབད་ནས་དེ་དག་གི་ལུང་ལེགས་པར་ཐོབ་བོ༎
དེར་དངུལ་གདུང་གི་ལས་ཀ་ཡང་མཐར་ཕྱིན་ནས་སྐུ་གདུང་ཡིད་བཞིན་ནོར་བུ་དབང་གི་རྒྱལ་པོ་ཉིད་ཀྱང་སྤྱན་དྲངས་ཏེ་སྔོན་བཀས་བཅད་པའི་དགོངས་དབྱིངས་བཞིན་དུ་བཞུགས་སུ་གསོལ་ཞིང། ཆབ་སེར་ལས་