[A:224]དགའ་གནས་དགའ་ལྡན་ཞིང་དེར་དགོངས་པའི་ཚེ༎
སྒྲ་བསྒྱུར་སྒྲ་ཚད་ཚུལ་རིག་ལོ་ཙ་བ༎
ཡིད་འབྱུང་ཡིད་སྐྱོའི་ངང་ནས་རྒྱ་གར་བཞུད༎
ལྷ་མིའི་གཙུག་རྒྱན་འཇམ་དབྱངས་ཞིང་འཕོ་ལ༎
ལྷ་དབང་འཆི་ལྟས་མཐོང་ལྟར་རབ་སྐྲག་སྟེ༎
ལྷ་ཡི་བཙུན་པ་ཤཱ་ར་དྭ་ཏིའི་བུ༎
ལྷ་མཆོག་ཤཱཀྱའི་རྒྱལ་པོའི་སྔོན་ལ་ཐེགས༎
གངས་ཅན་སྐལ་མེད་རྨོངས་པ་སྤྱི་བརྟོལ་ཅན༎
སྨྲ་མཁས་མཆོག་གི་ཉི་མ་འདས་ཟིན་གྱི༎
ལྷ་ངན་འུག་སྐད་མི་སྲུན་སྲིན་བྱའི་ཚོགས༎
འབད་དེ་རང་སྐད་སྒྲོག་ལ་གད་མོ་བྱོས༎
སྟོན་པའི་བསྟན་པ་འདུས་ནད་གཟེར་བུ་ཅན༎
འཚོ་བྱེད་སྨན་པའི་རྒྱལ་པོས་རིང་སྤངས་པ༎
བཤད་བསྒྲུབ་ཟུང་ཟད་སྲོག་གི་ལྷག་མ་ཁྱོད༎
འགྲོ་འདིའི་བདེ་སྐྱིད་དག་དང་ལྷན་ཅིག་གུམ༎
ཉི་ཚེའི་ཐོས་སྦྱངས་ཡུས་དག་མཁས་པའི་ཚོགས༎
བསྟན་པའི་ཚིག་དོན་དཔྱོད་པའི་ཁུར་མེད་ཀྱིས༎
སངས་རྒྱས་ལས་ལྷག་བློ་གྲོས་ཆེར་རློམ་དེས༎
སྨྲ་བརྗོད་འཆད་རྩོད་རང་དྲན་ལྷུར་ལོང་ཤིག༎
ཅེས་པཎྜི་ཏ་ཆེན་ཤཱཀྱ་མཆོག་ལྡན་དྲི་མེད་ལེགས་པའི་བློ་གྲོས་ཀྱི་རྣམ་པར་ཐར་པ་ཞིབ་མོ་རྣམ་པར་འབྱེད་པ་ལས། ཡོངས་སུ་མྱ་ངན་ལས་འདས་པའི་སྐབས་ལས་བསྒྲགས་པའི་རབ་ཏུ་བྱེད་པ་ཉི་ཤུ་རྩ་ལྔ་པའོ༎ ་༎
Chapter 26: phrin las kyi 'khor lo rgyun mi chad pa'i skabs
དེར་ཐོག་མར་གསང་ཐབས་ཀྱིས་སྐུ་རིམ་དུ་མིང་བཏགས་པའི་མང་སྐོལ་བསྟུད་མར་གནང་རྗེས། གསང་བརྟོལ་དང་རྗེས་འབྲེལ་མི་དབང་ཆེན་པོ་སྒར་པའི་དྲུང་ཡང་ཕེབས་ནས་གདུང་མཇལ་སོགས་གནང་ཞིང། སྐུ་གདུང་གི་ཆས་འབུལ་མི་ཀུན་གྱི་སྤྱན་ལམ་དུ་གསང་བའི་གནས་ལྟར་མི་མངོན་པ་དང། དབུའི་གཙུག་ཏོར་མཆོག་ཏུ་འཕགས་པ་སོགས་གསལ་བར་རྟོགས་ཤིང། གདུང་ལས་འཕྲོ་བའི་འོད་ཟེར་གྱིས་མཆོད་པ་བཤམས་པའི་མར་མེའི་འོད་ཟིལ་གྱིས་གནོན་པ། མཁས་པ་སངས་འོད་པ་དེ་དུས་སྐུ་གདུང་དྲུང་ན་བྱམས་ཆོས་ཀློག་སྒྲོགས་