[A:223]འོ་ན་ཅི་ལགས་ཞུས་པས། འོད་གསལ་ཟེར་བ་དེ་ཡིན་པར་སྣང་ངོ༎ ངོ་ཤེས་དགོས་པ་ཡིན་གསུང་ཞིང། དེར་གཏོར་ཤོམ་ད་ལྟ་རང་གྱིས་ཤིག་གསུང་བའི་ལུགས་ལྟར་བཤམས་ནས་རྒྱས་པར་འབུལ་བ་གནང། སྔགས་ཕྱག་རྒྱ་ཏིང་ངེ་འཛིན་ནན་སྦྱོར་དུ་མཛད་རྗེས། སེང་གེའི་ཉལ་སྟབས་ཀྱིས་ཨེན་ཙམ་གཟིམས་པའི་ཚུལ་བསྟན། དེ་ལས་བཞེངས་ནས་བོ་དོང་འཚོ་བྱེད་པས་ཕྱག་རྩ་ཅིག་ཞུས་པས། རྩ་དེ་མ་བསྡུས་སྣང་ངམ་གསུང་བ་ལ། ཆེར་མི་རྟོགས་པ་འདུག་ལགས་ཟེར། ཕྱག་འབུལ་ཞིག་བྱས་ནས་གསོལ་ཇ་སང་ཙམ་ཞིག་བཞེས་ཨེ་སྤྲོ་ཞུ་བ་ལ། དེ་ཀ་བགྱི་གསུང་ནས། གསོལ་ཇ་ཐོན་བྱུང་དུས། གཟིམས་དཔོན་རྣམ་རྒྱལ་བས་གསོལ་དཀར་བཏེག་ནས་ཞལ་ཧུབ་གང་གསོལ་ནས་དེ་བསྡུས་གསུང་སྟེ། སྐུ་བསྲང་ཕྱག་གཉིས་ས་གནོན་མཉམ་གཞག་གནང། དགོངས་པ་མངོན་དུ་མཛད་དེ་ཆོས་ཀྱི་དབྱིངས་སུ་སྙོམས་པར་ཞུགས་པའི་དེ་མ་ཐག། རྗེ་ཀུན་དགའ་རྒྱལ་མཚན་པས་ཉང་སྟོད་ནས་ལམ་བསྲངས་ཕེབས་པས། དྲུང་ཆེན་སངས་རྒྱས་སེང་གེས་ནན་དུ་སྤྱན་དྲངས། ཕྱག་མཛད་སྐུ་མདུན་དུ་བཞུགས་པས་སྤྱན་ཅེར་གཟིགས་བྱུང། བཀའ་ལུང་གཞན་ནི་ཅི་ཡང་མི་གསུང། དེར་རྗེ་ཀུན་དགའ་རྒྱལ་མཚན་པས་ཀྱང། སྐུ་དྲུང་དུ་བཞུགས་ནས་ཐུགས་དམ་ལམ་དུས་ཤིག་ལེན་པ་གནང་བ་ཡིན་ཞེས་ཐོས་སོ༎
ཀྱེ་མ་འཛམ་གླིང་ས་ཡི་ལྗོངས་འདིར་ནི༎
ཐུབ་པའི་སྐྱེས་མཆོག་ལན་གཉིས་འདའ་ཚུལ་བསྟན༎
རྒྱ་བོད་གདུལ་བྱའི་ཡིད་བདེའི་དཔལ་འཕྲོག་པའི༎
བརྩེ་ལྡན་ཁྱོད་ལས་ཁྲོས་པ་སྲིད་འདིར་སུ༎
ཐུབ་བསྟན་མཁའ་དབྱིངས་གསལ་བའི་ཀློངས་ཡངས་འདིར༎
བསྟན་འཛིན་རྒྱུ་སྐར་འཆར་ནུབ་མང་ན་ཡང༎
ཡོངས་རྫོགས་བསྟན་པའི་ཉི་ཟླ་ཁྱོད་གཤེགས་ནས༎
འཛམ་གླིང་གནམ་ས་མ་ལུས་མུན་པས་ཁྱབ༎
མགོན་ཁྱོད་མགོན་མེད་འགྲོ་འདི་ཡོངས་དོར་ན༎