[A:21]ཕམ་པ་ལས་དངོས་ཀྱིས་ནོད་པའི་བཤད་རྒྱུད་དྲི་མ་མེད་པ་དག་བུམ་པ་གང་བྱོར་ནོས་ཤིང། གཞན་ཡང་ཐལ་རང་གི་དབུ་མའི་གཞུང་ལུགས་རབ་འབྱམས་མ་ལུས་པ་ཡང། དགོངས་འགྲེལ་མཁན་པོ་གང་དང་གང་གིས་བཀྲལ་བའི་གཞུང་ལུགས་རྨ་མེད་པ་རྟོག་གེའི་ངན་རྟོག་དག་གིས་ཅི་དགར་མ་སྦགས་པའི་མཐའ་བྲལ་དབུ་མའི་དབྱིངས་གང་གིས་མངོན་སུམ་དུ་གཟིགས་པའི་ཡུལ་དངོས་ཉིད་འདོམས་ཤིང་དེ་ཉིད་ཇི་ལྟ་བར་ཡང་ཐུགས་སུ་བྱོན་ནོ༎
ཞེས་བྱ་བའི་གཏན་ཚིགས་ཡང་དག་པའི་ངེས་པ་ལས་ཀྱང་ཡིད་ཆེས་པར་དོན་གྱི་བྱིན་རླབས་འཕོ་བའི་ལམ་པ་སྟེ། ཚིག་སྦྱོར་ཙམ་བསླབ་སྦྱངས་སུ་ནོད་པ་ལ་ཐ་སྙད་དུ་སྒྲོག་པ་དག་གི་སྤྱོད་ཡུལ་དུ་མ་གྱུར་པའི་རྣམ་པར་དགོངས་པ་ལས་ཀྱང་ངོ༎
དེ་ནས་གླང་ཐང་དུ་དེ་ལོའི་སྟོན་ཆག་ལ་ཕེབས་སྐབས། ཐེག་ཆེན་ཆོས་ཀྱི་རྒྱལ་པོའི་སྲས་ཀྱི་ཐུ་བོ་གླང་ཐང་སྤྱན་སྔ་ཀུན་དགའ་རྒྱལ་མཚན་པའི་དྲུང་དུ་གུར་མགོན་ལྷ་བརྒྱད་ཀྱི་རྗེས་གནང་གསན་པའི་གཏོར་མའི་བཀའ་བསྒོ་དུས་ཆོས་སྐྱོང་དངོས་སུ་བཞུགས་དགོངས་པའི་ཟིལ་ཆེན་པོ་དང། བླ་མ་དང་ཆོས་སྐྱོང་དབྱེར་མེད་པར་གཟིགས་པའི་དད་མོས་རྒྱ་ཆེར་འཁྲུངས་ཤིང། དེའི་ཉིན་མན་ཤཱ་ས་ནའི་སྔགས་ཐུན་རེ་ཡང་གཏན་ནས་མ་ཆག་པར་བྱས། ཕྱིས་ས་སྐྱའི་གནས་མཇལ་ལ་བྱོན་དུས་དགུ་རུམ་གྱི་བསེ་འབག་ནག་པོ་འཕུར་ཤེས་ལ་མཇལ་དུ་ཕེབས་སྐབས། དཀོན་གཉེར་ན་རེ། མདངས་རྨི་ལམ་དུ་མགོན་པའི་གསུང་ལས། སང་ང་དང་སྔོན་གླང་ཐང་དུ་འཕྲད་མྱོང་བའི་དགེ་བའི་བཤེས་གཉེན་ཅིག་འཕྲད་དུ་ཡོང་བ་ཡོད་གསུང་བ་འདི་ལ་ལྟ་བར་སྣང་ཟེར་བས། ངེད་རང་གིས་གླང་ཐང་དུ་ཆོས་སྐྱོང་ཞུས་པའི་དུས་ཀྱི་སྣང་བ་དྲན་ཞིང་སྙིང་ནས་ཡིད་ཆེས་ཐོབ་ཅེས་དྲིན་ཅན་སྤྱང་ལུང་པའི་གསུང་ལས་ཐོས་པའི་ངག་སྒྲོས་སོ༎
དེའི་ཕྱི་ལོ་དབྱར་ཆོས་སྟེངས་སུ་གསང་ཕུར་ཕར་ཚད་ཀྱི་བློ་གསར་གྲྭ་སྐོར་གནང་ཞིང། འདི་ཐད་རྣམ་ཐར་