[A:22]རྗེ་དབོན་མར་དགུང་ལོ་བཅུ་གསུམ་ལ་མཛད་པར་བྱས་ལ། རྣམ་ཐར་མ་ཏི་མ་ལས། དགུང་ལོ་བཅུ་གཉིས་ཀྱི་སྟེངས་སུ་མཛད་པ་བྱས་པ་ནི། ཕྱི་མ་ལྟར་བཅུ་གཉིས་ཀྱི་སྟེང་ཁོ་ན་ཡིན་ཏེ། བཀའ་ལས་ངེད་ཀྱི་སྔོན་གསང་ཕུར་ལོ་བཅུ་གཉིས་ལ་ཕར་ཚད་གཉིས་ཀའི་རྣམ་གཞག་བྱས་ཤིང། དེ་དུས་རོང་ཊིག་འདི་ནི་སྔོན་ཆད་གཞན་གྱིས་མ་རྟོགས་པའོ༎ ཞེས་པའི་ཚིག་རིགས་རྣམས་ཀྱང་ཇི་ལྟ་བར་བཤར་བས། བཤད་གསར་གྱི་གྲལ་གྲོལ་རྗེས་གླིང་སྨད་ནས་མཁན་པའི་དྲུང་གིས་ངེད་དཔོན་སློབ་གཉིས་ཀ་ལ་ཇ་བུར་གཟབས་རྒྱས་སྩལ་ནས། ངེད་ལ་དགེས་པའི་ཚུལ་གྱིས་ཞལ་ཀུར་དུ་ཁྱེད་ཤེས་རབ་ཡངས་ཤིང་ཁ་པོ་ཆེ་བ་རང་སྣང་ངོ༎ ད་སེམས་ཅན་དཀར་པོ་ལ་སོ་ཐེབས་པ་ཞིག་དགོས་སོ་གསུང་བ་རང་རེས་དུས་དེར་མ་གོ་བར་ནང་དུ་རྗེ་དོན་དོན་ཡོད་དཔལ་བ་ལ་རྒྱུ་མཚན་ཞུས་པས། རོང་ཊཱིཀ་ཚིག་རིགས་བཤར་བ་ལ་མཉེས་པར་འདུག༎ སེམས་ཅན་དཀར་པོ་ཆོས་དུང་བུས་ནས་གསང་ཕུའི་གདན་ས་བྱེད་པ་ལ་བློ་ནུས་གཏད་དགོས་གསུང་བར་སྣང་གསུང་ཞེས། སྔོན་གྱི་མངའ་རིས་ན་ཡོད་པ་གྲྭ་རྒན་རྣམས་ཇ་གྲལ་དུ་ཡང་ཡང་སྨྲ་བས་མཚོན་པའོ༎
དེ་ལོ་རྔོག་ལོའི་གདན་ས་སངས་རྒྱས་ཆོས་སྐྱོང་བའི་དྲུང་དུ་ཕར་ཕྱིན་རོང་ཊཱིཀ་སྟེངས་ནས་གཞུང་ཆོས་དང་ལྷག་པར་ཚད་མ་རྣམ་པར་ངེས་པ་དཔྱིས་ཕྱིན་པའི་ཟབ་བཤད་ཞུས་ཤིང། རྣམ་ངེས་ཀྱི་བརྒྱུད་པ་ཡང་འདི་ཉིད་ལས་འདེད་པར་མཛད། གཞན་ཡང་བརྒྱད་སྟོང་པའི་ལུང། སྨན་བླའི་མདོ་བཞི་བརྒྱ་པ། མཁན་པོ་བོ་དྷི་ས་ཏྭའི་ཆོ་ག་འབྲིང་པོ། ཤེར་ཕྱིན་བཀའ་བབས་བཞི་སོགས་ཀྱི་ལུང་གསན་ཞིང། སྐབས་འདི་ཉིད་དུ་གསང་ཕུའི་སློབ་དཔོན་གྲགས་པ་བཀྲ་ཤིས་པ་ལ་ཡང་ཕར་ཕྱིན་རོང་ཊཱིཀ་གི་སྐབས་གཉིས་དང། ཁྱད་པར་ཆ་བསྡུས་ལ་མཛུབ་ཁྲིད་གནང་ནས་དེ་ནང་གི་བརྗོད་བྱ་ཕྱིས་བྱོན་གྱི་རང་བློས་གཞལ་ནས་འཁྱོག་པོར་ཕྱེ་བའི་དམིགས་བསལ་ཕྱེ་སྟེ་བཙལ་བས་རང་གཞན་