[A:19]དེ་ཡིན། འདི་ལ་ཞལ་བཞི་པ་ལུས་དང་གྲིབ་མའི་ཚུལ་དུ་རྗེས་སུ་འབྲངས་པས། བར་ཆད་ཀྱི་གཡེང་བ་གང་ཡང་མེད་པར་ཐོས་བསམ་མཐར་ཕྱིན་པར་འགྱུར་ངེས་པས་སློབ་དཔོན་པ་ཁྱེད་ཀྱིས་ཀྱང་བསླབ་སྦྱངས་ཀྱི་གྲོགས་དན་ཡང་དག་མཛོད་ཅིག་ཅེས་གསུང་ཞིང་གཉེར་གཏད་དུ་མཛད་ནས། དེའི་དབྱར་ཆོས་སྟེངས་སུ་གསང་ཕུར་ཕེབས་ཞེས་གླེང་ངོ༎
དེ་ནས་གནས་སྒོར་བཞུགས་པའི་ཕྲལ་གྱི་གནས་ཀྱི་སློབ་དཔོན་ནི་མཁན་ཆེན་ཉི་མའི་དྲུང་གིས་གནང། རྗེ་དོན་ཡོད་དཔལ་བ་ཕྱོགས་ཀྱི་གདུལ་བྱ་ཕྲན་བུ་ལ་ཕེབས་པ་སོགས་ཀྱི་སྐབས་སུ་ཡང་དབོན་ཆུང་རང། དྲུང་ཇོ་གདན་པའི་རྩ་རང་དུ་སྡོད་ཅིག༎ གཞན་སྤྱོད་པ་ཆུད་བྲོས་ཡོང་གསུང་བ་ཅིག་ཡོད་ཅེས་དེ་དུས་ཀྱི་རྗེ་དོན་ཡོད་དཔལ་གྱི་གྲྭ་རྒན་མང་དཀར་བ་ཚུལ་ཁྲིམས་དཔལ་མཆོག་ཏུ་གྲགས་པའི་ཚད་སྟོན་གསང་ཕུ་རང་ན་བཟང་བར་བྱས་པ་དེ་ཉིད་གསུང་ཞེས། རྡོ་རྗེ་སློབ་དཔོན་རབ་གསལ་ཟླ་བ་མགོན་པའི་གསུང་ལས་ཐོས་ཤིང། གོང་མའི་ཚུལ་ཁྲིམས་དཔལ་མཆོག་ཀྱང་རྗེ་དེ་ཉིད་ཀྱི་ཁུ་བོ་ཡིན་ནོ༎
དེ་དུས་བདག་ཉིད་ཆེན་པོ་དེ་ཉིད་སྐྱེ་བའི་གནས་དུ་མར་གྲུབ་སྦྱངས་ཀྱི་ལམ་མཐོན་པོའི་གོ་འཕང་མངོན་པར་མཛད་པའི་དབང་ལས། སྒྱུ་མ་ལྟ་བུའི་ཏིང་ངེ་འཛིན་ཐུགས་ལ་གསལ་བར་འཁྲུངས་ནས། རང་གི་སྐུའི་ཆ་ཤས་མ་ལུས་པ་ཕྱི་གསལ་ནང་གསལ་ཤེལ་སྣོད་དངས་པར་གད་ཆུ་བཀོད་པ་ལྟར་གྱུར་པས། ཕྱག་སོགས་ཀྱི་འགྱུར་བས་སྐུ་ལུས་ཟང་ཐལ་དུ་སོང་བའི་ཐུགས་མྱོང་དང། རེས་འགའ་སྐུ་ལུས་རང་ཡང་ག་རེ་ཞེས་ཕྱག་གཡས་གཡོན་ཕན་ཚུན་གཅིག་གིས་གཅིག་བཙལ་བས་རེག་པ་མེད་པར་ཉི་ཟེར་ལ་མཛུབ་མོས་ཉུལ་བ་ཇི་ལྟ་བའི་ཚུལ་གྱིས་དངོས་བྲལ་དུ་དགོངས་པར་གྱུར་ཅིང། དུས་དེར་འོད་གསལ་ཟླ་བ་ཤར་བའི་སྣང་བས་ཉིན་མཚན་དབྱེ་བ་མེད་པར་མཚན་དུས་ཀྱང་ཉིན་མོ་ལྟར་བསླབ་སྦྱངས་ཀྱི་དཔེ་མཐའ་དག་གཟིགས་པ་ལ་རྩོལ་བ་མཛད་པར་གྱུར་པའི་སྐབས།