[A:201]མཁན་པོ་ཡང་དག་རྫོགས་སངས་རྒྱས༎
དེ་ནས་ཕྱོགས་ཀྱི་གླང་པོ་ཡིས༎
དོན་དེ་འཇམ་དཔལ་དབྱངས་ལ་གསན༎
ཕྱོགས་གླང་གཞུང་བརླིང་རྟོགས་དཀའ་བ༎
གསལ་བར་འཆད་མཁས་གྲགས་པའི་མཚན༎
གཞུང་རྩོམ་གཞན་ལ་མ་གྲགས་པ༎
རྔོག་ལོས་གསལ་བར་བཤད་ཅེས་གསུང༎
བོད་ཀྱི་རྒན་པོའི་ལུགས་དོར་བ༎
ས་སྐྱའི་འཇིགས་མེད་དཔའ་བོས་བཤད༎
སྔོན་མས་གསལ་བར་མ་བྲིས་ཤིང༎
ཕྱིས་འབྱུང་གཏམ་གྱིས་མ་སྦགས་པར༎
རྟོག་གེའི་མཚོ་ནས་བརྡ་ཆད་ཀྱི༎
སྙིང་པོ་བསྡུས་པའི་དཔག་བསམ་འདི༎
གང་གི་རྣམ་དཔྱོད་སྐྱེད་ཚལ་དུ༎
དགེ་བར་གཤིན་ཞིང་ཤིས་གྱུར་པ༎
རྗེ་བཙུན་བློ་གྲོས་རྒྱལ་མཚན་དཔལ༎
བཟང་པོའི་བཀའ་དང་དེ་ཉིད་ཀྱི༎
འབྱོར་པའི་བང་མཛོད་ནས་བྱོན་པའི༎
ཞེས་སྔོན་དང་ད་ལྟའི་གནས་མ་ལུས་པའི་གནས་དོན་བདེ་བླག་ཏུ་རྟོགས་པར་བྱེད་པ་ཤ་སྟག་འབྱུང་ངོ༎
གཞན་ཕྱོགས་གླང་ཆོས་གྲགས་ཀྱི་རྟོགས་བརྗོད། གཞི་གསུམ་ཆོ་ག། བྱ་པས་གསེར་ཐུར་ལ་དྲིས་པའི་ལན་འདེབས་སོགས་གསུང་རྩོམ་ཕྲ་མོའི་པར་ཀྱང་མང་དུ་སྤེལ་ལོ༎
དངོས་བསྟན་བསྟན་བཅོས་སུ་མ་འཁོད་པར་གཞུང་ཚིག་རང་གི་སྟེངས་སུ་བཀའ་སྩལ་གྱི་བཤད་པས་གཏན་ལ་ཕབ་པའི་ཚུལ་རྣམ་ཐར་གཉིས་སུ་ཟུར་ཙམ་ཡང་མ་སྨོས་འདུག་ལ། རྣམ་ཐར་མ་ཏི་མར་གྲངས་སུ་བཏབ་པ་ནི་འདི་ལྟར། འཕགས་པ་བརྒྱད་སྟོང་པ་སློབ་དཔོན་སེང་གེ་བཟང་པོའི་བརྒྱད་སྟོང་འགྲེལ་ཆེན་དང་བཅས་པ། སྡུད་པ། འདུལ་བ་མེ་ཏོག་ཕྲེང་རྒྱུད་རྗེ་རོང་སྟོན་ཆེན་པོའི་ཊཱིཀའི་སྟེངས་དང། ཡང་དེ་ཉིད་ཀྱིས་མཛད་པའི་དབུ་མའི་སྟོང་ཐུན། བསླབ་སྤྱོད་གཉིས། དཔའ་བོའི་སྐྱེ་རབས། ཐེག་བསྡུས། མདོ་སྡེ་རྒྱན། རྒྱུད་བླ་མ། དབུས་མཐའ་རྣམ་འབྱེད་རྣམས་ཀྱི་འགྲེལ་པ། དབུ་མ་ཚིག་གསལ། ཡེ་ཤེས་སྙིང་