[A:198]རྒྱ་ཆེར་གནང་ཞིང། གཞན་ཡང་སྔགས་ཆོས་ཕྲན་ཡང་བདེ་མཆོག་ལུ་ཧི་པའི་དབང་དང་བསྐྱེད་རྫོགས། བདེ་མཆོག་དྲིལ་བུ་པའི་ལུས་དཀྱིལ་དང་འབྲེལ་བར་དྲིལ་བུ་རིམ་ལྔའི་ཁྲིད། བདེ་མཆོག་དཀར་པོའི་བྱིན་རླབས་ཁྲིད་དང་བཅས་པ་རྗེ་བྲག་དཀར་དམར་གྱིས་ཞུ་བ་པོ་གནང་ནས་རིམ་པར་སྩལ་ཞིང། རྗེ་སེམས་དཔའ་བྲག་དཀར་བའི་དྲུང་གཏིང་སྐྱེས་ཚོར་དགོངས་དབྱིངས་བག་ཙམ་འཛེར་བག་བྱུང་བའི་དབང་ལས་ཕེབས་སྐབས་ཤིག་བཞུགས་ས་བླ་བྲང་གི་ཀ་དྲུག་མ་རང་དུ་གནང་ནས། བདེ་མཆོག་ནག་པོ་པའི་དབང་སོགས་བཀའ་ཆོས་ཟབ་མོ་རྣམས་དང། ད་ལྟའི་ཆོས་ཕྲན་བརྒྱ་རྩའི་ནང་གི་བརྗེད་བྱང་ཞུས་པའི་བཀའ་ཆོས་ཕལ་ཆེར་ཀྱང་ཚིག་བརྒྱུད་དུ་གསན་ཞིང། བདེ་མཆོག་ནག་པོ་པའི་དཀྱིལ་ཐང་ཆེད་དུ་གཏད་ནས་ངས་བྲིས། དེའི་སྟེང་ནས་དབང་བསྐུར་ཡང་མཛད་ཅེས་དཔོན་དར་དངོས་ལས་ཐོས་ཤིང། རྗེ་སེམས་དཔའ་ཆེན་པོ་བྲག་དཀར་བས་ཕྱིས་གསེར་མདོག་ཅན་དུ་ཕེབས། ལམ་འབྲས་ཐོག་མ་རང་དེ་ཚོགས་ལ་གནང་དུས་གཏིང་སྐྱེས་པ་རང་གི་སྤྱི་ཁང་ན་བཞུགས་སྐབས་ཕྱག་གཡོན་པའི་སྲིན་མཛུབ་ལས་མཚལ་ཁྲག་རང་རྡོལ་དུ་བྱུང་བས། རྒྱ་རྒན་པའི་ཆོས་མཛད་པས་དངོས་སུ་མཐོང་བས་ནན་བསྐྱེད་གསོལ་བ་བཏབ་ནས། བླ་བྲང་དུ་སླར་རང་རེ་རང་ལ་དབང་བསྐུར་གནང་དུས། དཔོན་དར་གྱིས་ཆེད་གཏད་རང་བྲིས་པའི་བདེ་མཆོག་ནག་པོ་པའི་དཀྱིལ་ཐང་གཡར་པོ་དགོས་ཞུར་གནང་བ། རྗེ་དབོན་ཤཱཀྱ་རྒྱལ་མཚན་པས་ཀྱང་དགོངས་ནས་ནམ་ཞུས་གནང་སྟེ། དེར་ད་གསུམ་དགོས་པས་གསུང། ཉུག་པ་དབུ་མཛད་དཀོན་མཆོག་རྒྱལ་མཚན་ང་དང་དབང་མི་གསུམ་རང་ལ་ཐོག་མར་སྩལ་ཞིང། ཕྱིས་སྤོས་ཁང་པའི་མཁན་ཐོག་རང་དུ་གདན་ཆགས་སྐབས་མཁན་རིན་པོ་ཆེའི་ཞལ་སྔ་ནས་སེམས་དཔའ་ཆེན་པོའི་དྲུང་དུ་གསེར་མདོག་ཅན་དུ་གསུང་ངག་གསན་ནས་ཚུར་ཕེབས་སྐབས། བཀྲ་ཤིས་