[A:171]བོ༎
དེར་རྡོ་རྗེ་གོས་སྐུའི་བཞུགས་གནས་ཀྱི་གྱེང་ཁར་དུ་མཛད་ནས་གོས་སྐུ་ལེགས་པར་གྲུབ་པའི་ཞལ་དྲོའི་རབ་གནས་ལ་ཤངས་འབྲོང་སྒང་ནས་སྡེ་པའི་བསྙེན་བཀུར་དང། བླ་བྲང་ནས་སྤན་པ་མི་མངས་ལ་གྲོ་འགྱེད་བཟང་བ་རང་ཞིག་སྩལ་ཞིང། བྱ་རྒོད་ཕུང་པོའི་ཆོས་ཁྲིའི་སྟེངས་ནས་ལྷག་གནས་ཀྱི་མེ་ཏོག་འཐོར་བ་གནང་དུས། ནམ་མཁའ་ལ་འཇའ་སྤྲིན་ལེགས་པ་དང། མེ་ཏོག་གི་ཆར་ཆེན་པོ་བབས་ཤིང། དེའི་ཉིན་རྒྱ་བར་མདའ་དཔོན་མ་མི་དམངས་བྱིན་གྱི་ཁྲོམ་གནོན་ལ་ཡོད་དུས་ཁོང་གིས་བརྡའ་སྦྱོར་བྱས་ནས། ཤཱཀྱ་ཐུབ་པ་ཟེར་བའི་གྲགས་ཚོད་ཅན་དེ་འདི་འདྲ་ཞིག་ཡོད་སྣང་བས་གཟིགས་ཤིག། ལར་པཎ་ཆེན་རིན་པོ་ཆེ་རྒྱལ་བ་བྱམས་པ་དངོས་འདིས་བཀའ་བཀོད་གནང། སྤྲུལ་སྐུ་སྨན་ཐང་པ་ཡབ་སྲས་འཇམ་དབྱངས་དངོས་བྱོན་རྣམ་པས་ཕྱག་བཟོ་གནང་བ་ལ། ད་ལྟ་བརྟགས་དུས་ཤཱཀྱ་ཐུབ་པའི་ལྟོ་སྣོད་ཕྱག་ཏུ་ཡོད་པ་དེ་ཆད་འདུག་པས། རང་རེའི་སྤན་པའི་མི་མངས་རྣམས་ལ་ཨེ་དགའ་འམ་བྱས་པས། རྣམ་རྟོག་ཟོས་པ་འགའ་རེ་བྱུང་བའི་གཏམ་རིམ་གྱིས་པཎ་ཆེན་རིན་པོ་ཆེའི་སྙན་དུ་དགོངས་ནས། ག་རེ་བླུན་པོ་གང་ལབ་ཁུངས་ཅི་ཡོད། ལར་རང་སངས་རྒྱས་ཏིང་ངེ་འཛིན་ལ་བཞུགས་པའི་ཕྱག་ཏུ་བཞེས་སྣོད་ཅི་ཡོད། ལྷ་སའི་ཇོ་བོ་རིན་པོ་ཆེའི་ཕྱག་ཏུ་ལྷུང་བཟེད་ཕུལ་བའི་རྟེན་འབྲེལ་ལས། རང་རེ་ཡོ་ཟས་ཕྱིར་ཐོས་བསམ་བསྒོམ་གསུམ་ཡོ་རང་ཤོར་བ་འདི་བྱུང་བ་ཡིན་ནོ༎ གསུང་ཞེས་ནང་པ་སྨན་ཐང་པའི་ངག་ལས་ཐོས་སོ༎
དེ་ནས་དགུན་བཞུགས་ལ་འཇམ་དབྱངས་སྤྱན་རས་གཟིགས་ཏེ་ལྡེམ་གཉིས་ལ་ཡང་རབ་གནས་ཕུལ་ནས། བྱམས་པའི་སྐུའི་གཡས་གཡོན་དུ་བཞུགས་སུ་གསོལ་ཞིང། དེ་གཉིས་ཀྱི་སྐུ་ཚད་ལ་པཎ་ཆེན་རིན་པོ་ཆེའི་ཕྱག་ཁྲུ་དྲུག་ལྷག་པ་པད་གདན་དང་བཅས་པ་ཡོད་གྲགས་ཤིང། དེ་ལོ་ཡན་ལ་འདུ་ཁང་གསར་པ་ཀ་བ་སུམ་ཅུ་