[A:168]གྲང་ཅིག་རྐྱན་ལ་གཏོར་སོང། དེ་ནས་དགོངས་ཁ་ཁྱེད་རྣམས་འོད་དམར་ཨེ་སྲུང་ཟེར་བས། རྒྱུ་མཚན་ཅི་ཡང་མ་ངེས་པར་ཡང་ལགས་ལགས་བྱས་པས། ཁོས་ལགས་ལགས་དང་ཁྱེད་རང་རྣམ་པ་དང་མཇལ་མྱོང་འདུག་གོ་ཟེར་བས་ཞེད་དེ་སང་སྔ་བར་ལངས་ཕྱིན་པས། གླང་ཐང་དུ་སླེབ་འཕྲལ་དོ་གལ་ཆེན་པོ་རང་ཡོད་པ་སྐད་ཀྱིས་པཎ་ཆེན་རིན་པོ་ཆེ་ལ་རྒྱུ་མཚན་ཕུལ་བས། ལྷག་པར་བཞད་ཅིང་དེ་ལ་ཞེད་མི་དགོས། འདུལ་བའི་བརྡའ་ཆད་ཅིག་ཡིན་གསུང་ཞིང། ཕྱིས་ཀྱང་འདིས་སྐྱོར་ཟློས་ཡང་ཡང་གནང་བ་ཞིག་བྱུང་ཟེར། གཞན་གྲ་པ་འཕན་ཆས་བཟང་བ་བསོད་སྙོམས་མི་དགོས་པ་འགས་བྱང་རྭ་བསྒྲེང་སོགས་ཀྱི་གནས་སྐོར་ལ་བྱོན། ཡང་རྐང་པ་བཟང་བ་འགའ་རེ་དབུས་སྟོད་ལ་ཇ་སློང་ལ་ཕྱིན་ཞེས་གྲགས་ཤིང། དེ་སྐབས་པཎ་ཆེན་རིན་པོ་ཆེས་སྟག་ལུང་དུ་ཕེབས་ནས། སྟག་ལུང་ངག་དབང་གྲགས་པ་ལ་དོ་ཧ་སྐོར་གསུམ་པར་པུ་བ་བློ་གྲོས་སེང་གེའི་ཊཱི་ཀའི་སྟེང་ནས་ཟབ་བཤད་དང། ཕྱག་ཆེན་ལྔ་ལྡན་དང་ཡི་གེ་བཞི་པའི་ཁྲིད། རྒྱབ་ཚེས་སུ་གྲུབ་པ་སྡེ་བདུན། ཨ་མ་ན་སིའི་ཆོས་སྐོར་མཻ་ཏྲི་པ་ལས་བརྒྱུད་པའི་རྒྱ་གཞུང་ཉེར་བཞིའི་ལུང། ཡེ་ཤེས་མགོན་པོ་ཕྱག་བཞི་པའི་དབང་སྒྲུབ་སྐོར་མ་ལུས་པ་དང་སྟག་ལུང་པའི་དཀར་བརྒྱུད་གསེར་འཕྲེང་གི་ལུང་རྣམས་གསན། འདི་སྐབས་རྗེ་དྲུང་ཀུན་དགའ་རྒྱལ་མཚན་པ་དང། རྗེ་བྲག་དམར་བ་གཉིས་ཀྱང་ཕྱགས་ཕྱིར་ཡོད་ཅིང་སྟག་ལུང་དགེ་དབང་གྲགས་པ་ལ་དཀའ་འགྲེལ་གསན་ནོ༎
དེར་སྟག་ལུང་ངག་དབང་གྲགས་པས་ས་སྡེ་ལ་གཙོ་བོར་དྲི་མལ་གནང། གཞན་ཡང་འདུལ་མངོན་སོགས་ནས་རིག་གནས་ཕྲ་མོའི་བར་ལ་ཉིན་རེ་བཞིན་དུ་གང་དྲི་བ་གནང་བའི་ཚིག་དེས་ཇ་གྲལ་དེ་འཁྱོངས་པས་ཐུགས་གཏིང་ནས་དགེས། ག་རེ་ཡོན་གནས་ཀྱི་མཆོག་དམ་པ་རང་ཞིག་འདུག་གོ་གསུང། གོས་དར། གསེར་བརྟུལ་མ་ཞོ་བརྒྱད་ཅུ་