[A:157]ཁམས་པར་གྱི་དད་མོས་ཅན་མཐའ་དག་གིས་གུས་པས་བསྟབས་པའི་དངོས་པོ་ཆེ་ཆུང་མ་ངེས་པ་དང། ཐ་ན་ནས་འབྲུ་ཕྲ་བ་ཙམ་ཡང་ལོག་འཚོར་མི་འགྱུར་བའི་དགེ་ཚོགས་ཀྱི་ལེགས་འཕེལ། ཉེར་གནས་ཡིད་བཞིན་ནོར་བུ་རིན་པོ་ཆེ་དྲུང་ཆེན་སངས་རྒྱས་སེང་གེ་བས་ཕྱག་བཞེས་ཀྱིས་ཐོ་བ་གནང་ནས། དབྱར་དགུན་གྱི་ཐུག་ཚུལ་སོགས་ཀྱང་སྒྲིགས་སུ་འཁྱོན་པ་གནང་ཞིང། བཅའ་ཡིག་རྣམས་སུ་འཁོད་པ་ལྟར་སྒྲིགས་རྣམ་གཞག་སྤྱི་དང། ཆོས་ཀྱི་སྒྲིགས་སྤྱི་བསྐྱུར་དང། གླིང་བསྲེས་དག་ཀྱང་གསང་ཕུའི་རྒྱུན་གྱི་ཐ་སྙད་མ་ཆག་པ་རེ་གནང་ངོ༎
དེར་མེ་ལུག་vc: 1487དགུང་ལོ་དྲུག་ཅུའི་སྟེངས་སུ་ཕེབས་པའི་སྐབས་ཀྱི་སྟོན། སྤྱི་བསོད་པ་རྣམས་ཀྱི་ནས་ཕུང་ལ་ཕྱག་ནས་ཞུས་པས་རྒྱས་པར་གནང་ཞིང། དེ་མཚམས་དབོན་པོ་རིན་ཆེན་བཀྲ་ཤིས་པ་བར་སྒོར་ཕྱགས་ཕྱིར་འབྲངས་པ་ལ་དངོས་ཀྱི་བཀའ་ལུང་ལ། ཁྱེད་རང་རྣམ་པ་ནས་ཁལ་བཅུ་གསུམ་ཙམ་རེ་དང་བྲེ་ཁ་རེ་ཨེ་ཡོང་ལྟོས་གསུང་བའི་བཀའ་ལུང་བསྒྱུར་བས། ཁོང་རྣམས་ཀྱི་ནས་ཀྱི་བྱུང་ཁུངས་བསྒྲིགས་པས། མི་རེ་ལ་ཁལ་བཅུ་རེ་ལས་ཐོབ་མི་ཐོབ་ལས་མ་བྱུང་བས། ཡུན་རིངས་བར་དུ་བསོད་སྙོམས་ནས་བགོད་རྔོ་མ་ཐོགས་པར་ལུས། དེར་རྒན་པ་འགས་གྲོས་ཐག་བཅད་ནས། ད་བཀའ་ལུང་བཞིན་རང་བགོས་བྱས་ནས། སྤྱི་ཟོ་ལ་བཤར་བས་གྲྭ་པ་མི་རེ་ལ་ཁལ་བཅུ་གསུམ་དང་བྲེ་ལྔ་དྲུག་རེ་ཁྱེད་པས་ཀུན་མཚར་དུ་འཛིན་ཅིང། མི་ཟད་ནམ་མཁའི་མཛོད་ལ་དབང་སྒྱུར་བའི་ཏིང་ངེ་འཛིན་གྱི་རྣམ་འཕྲུལ་ཁྱད་པར་ཅན་གྱིས་དབུལ་བའི་ཡུལ་ལས་ཡོངས་སུ་སྐྱོབས་པའི་བཀའ་དྲིན་མཛད་པ་ནི་ཡོངས་ལ་གསལ་ཏོ༎
དེར་ས་ཕོ་སྤྲེའུའི་ལོ་vc: 1488དགུང་ལོ་རེ་གཅིག་གི་སྟེང་དུ་ཕེབས་སྐབས་ཚད་མའི་ཊཱི་ཀ་ཐུགས་རྩོམ་མཛད་ནས་སྔ་ཕྱིར་གཏོང་ཆོས་ལ་སྩལ་ཞིང། བཀའ་ལས་ཕར་ཕྱིན་རོང་ཊཱིཀ་དང།