[A:431]བསྐྱུངས་པའི་བསྒྲུབ་པ་རྩེ་གཅིག་ལ་ཉེ་བར་གཞོལ་བའི་དགོངས་པ་སྔོན་དུ་གཏང་མུས་སུ་ཕེབས། སྒྲུབ་པ་ལུང་སྦྱིན་གསན་ནས། དེ་དང་འཐུན་པའི་སྒྲུབ་པ་དང་ཉམས་ལེན་འཕེལ་པོ་མཛད། སྐབས་དེ་དང་གཞན་དུའང། བདག་ཆེན་ཆུ་མིག་པ་ལ་སྒྲུབ་ཐབས་བརྒྱ་རྩ་དང་བཀའ་འབུམ་སོགས་མང་དུ་གསན། གནས་དེར་སྒྲུབ་པ་ལ་ལོ་གྲངས་མང་ཙམ་ཞིག་གི་བཞེད་པ་མངའ་ཡང། འཕན་ཡུལ་དུ་ཡབ་དྲུང་ཆེན་བདེ་བར་གཤེགས་པ་སོགས་ཀྱི་རྣམ་གྲངས་མང་པོ་ལ་བརྟེན། ཕྱིར་ལམ་ཨེ་ཝཾ་དུ་ཆོས་རྗེ་ཀུན་དགའ་དབང་ཕྱུག་པ་ལ་ཟབ་ཆོས་མང་ཞིག་གསན་ནས་ཕྱིར་ཕེབས། དེ་ལྟར་གཙང་ཕྱོགས་སུ་ལན་གསུམ་ཕེབས་པའི་ཐོག་མ། རང་ལོ་ཉི་ཤུ་རྩ་ལྔ་པ་ལ། རྗེ་སེམས་དཔའ་ཆེན་པོས་མཁན་པོ། བདག་ཆེན་ཆུ་མིག་པས་ལས་ཀྱི་སློབ་དཔོན། རྗེ་ཀུན་དགའ་རྡོ་རྗེས་གསང་སྟེ་སྟོན་པ། ཆོས་ཀྱི་རྗེ་དོན་ཡོད་དཔལ་སོགས་ཀྱིས་ཁ་སྐོང་མཛད་ནས་བསྙེན་པར་རྫོགས་རྗེས་སུ་ཆོས་རྗེ་དོན་ཡོད་དཔལ་བ་ལས། གསེར་མདོག་ཅན་དུ་རྗེ་ཐམས་ཅད་མཁྱེན་པས་མཛད་པའི་འབུམ་ཊིཀ་ཆེན་མོའི་ལུང་དང། ཐེག་ཆེན་ཆོས་ཀྱི་རྒྱལ་པོའི་བཀའ་འབུམ་སྤོད་བཞི་མའི་ལུང་རྣམས་གསན། ཡང་རྗེ་དོན་ཡོད་དཔལ་བ་དང་རམ་སྡིངས་མར་འཛོམས་དུས་མཛད་ནས། འདུལ་བ་མདོ་རྩ་བ་དམར་ཊིཀ་གི་སྟེང་ནས་རྒྱས་པར་གསན། སྐྱོར་ཆོས་དང་སྐྱོང་རན་སོགས་ཟླ་བ་གསུམ་ལ་རྫོགས་པ་མཛད། ཡང་རྗེ་འདི་པས་རང་ལོ་ཉེར་བདུན་པའི་སྐབས་དེར་རྭ་སྒྲེང་ཀ་བཞི་པར་གྲགས་པའི་ཆོས་རྗེ་རིན་ཆེན་བཀྲ་ཤིས་པ་གླང་རི་ཐང་དུ་སྤྱན་དྲངས་ལོ་གཉིས་སུ་བཞུགས། རྗེ་གོང་མའི་རྣམ་ཐར་དུ་བརྗོད་ཟིན་པ་ལྟར། དབང་རྡོ་རྗེ་ཕྲེང་བ་དང། དུས་ཀྱི་འཁོར་ལོའི་དབང་དང་རྒྱུད་འགྲེལ་གྱི་བཤད་པ་ལ་སོགས་པ་སྐྱར་ཆོས་དང། རྩིས་ཡན་ཆོད་ལ་བསླབ་