[A:430]ཐུགས་བཞེད་ཡོད་པ་རྣམས་གསན་ན་ལེགས་གསུང་པ་ཕེབས། ཇི་ལྟར་བཀའ་གནང་བ་བཞིན། གདན་སའི་གནས་མཇལ། བདག་པོ་གཞི་ཐོག་པའི་དྲུང་དུ་ཆོས་གསན་པ་སོགས་མཛད་ནས། མུས་བདེ་བ་ཅན་དུ་ཐེགས་བདེ་དགྱེས་གསང་གསུམ་དང་འབྲེལ་པའི་དབང་ལུང་མན་ངག་གསན་པ་རྒྱ་ཆེ་ཞིང་ཐུགས་དམ་འཕེལ་བར་བཞུགས་པའི་སྐབས་སུ། ཨེ་ཝཾ་དུ་བྱི་བ་ལོ་ཧོར་ཟླ་བཞི་པའི་ནང་དེར། རྗེ་རིན་པོ་ཆེ་བདེ་བ་ཅན་དུ་གཤེགས་པའི་དགོངས་པ་མངོན་དུ་མཛད་ནས། སེམས་དཔའ་ཆེན་པོ་གདན་སར་སྤྱན་འདྲེན་བྱུང་པ་དང་དཔོན་སློབ་ཆབས་ཅིག་པར་ཨེ་ཝཾ་དུ་ཕེབས། དེར་ཡང་གསུང་ཆོས་ཀྱི་བཞེད་པ་རྣམས་རེ་ཤིག་གྲུབ་པར་མཛད་ནས། རྩེ་ཚན་དུ་མཁན་ཆེན་དཀོན་མཆོག་བཟང་པོའི་དྲུང་དུ། རྣལ་འབྱོར་ཡན་ལག་དྲུག་པའི་ཉམས་ཁྲིད་ངོ་སྤྲོད་ཆ་ལག་རྣམས་རྫོགས་པར་གསན། བྱི་ལོ་དེ་ཉིད་ཀྱི་སྟོན་གླང་རི་ཐང་དུ་ཕེབས། ལོ་གྲངས་དུ་མའི་བར་དུ་ཆོས་སྡེ་དེ་ཉིད་དང། དབེན་གནས་སོ་སོར་བཤད་སྒྲུབ་སྤེལ་མར་མཛད། ཕྲིན་ལས་དར་ཞིང་རྒྱས། དེ་ནས་རང་ལོ་སོ་གཅིག་པ་ཆུ་ཕོ་རྟའི་ལོ་ལ། རྗེ་ཀུན་དགའི་མཚན་ཅན་དང། སྐུ་མཆེད་གཉིས་ཀས་སྔར་མ་གསན་པའི་ཆོས་གསན་པ་དང། གསན་ཟིན་གྱི་ཆོས་རྣམས་ལ་རྟོགས་པ་གོང་འཕེལ་གྱི་སྒྲོ་འདོགས་གཅོད་པ་དང། གཙོ་བོར་ཉམས་མྱོང་གི་རྟོགས་པ་གོང་འཕེལ་ལ་དགོངས་ནས། རྗེ་སེམས་དཔའ་ཆེན་པོའི་དྲུང་དུ་སྐྱོད། ལོ་གཅིག་ལྷག་ཙམ་གདན་ཆགས། སླར་ཨེ་ཝཾ་དུ་ཕེབས། འཇམ་དབྱངས་ཤེས་རབ་རྒྱ་མཚོ་ལ་རྒྱུད་གསུམ་གྱི་བཤད་པ་རྒྱས་པ་སོགས་གསུང་ཆོས་མང་དུ་གསན། སྤྲེའུ་ལོ་ལ་འཕན་ཡུལ་དུ་ཕེབས་ནས། བཤད་བསྒྲུབ་སོགས་རྣམ་དཀར་གྱི་མཛད་པ་ལ་བར་ཆད་མེད་པར་བྱུང། ཡང་རང་ལོ་སོ་བདུན་པ་བྱི་བའི་ལོ་ལ་རྗེས་མུས་པ་ཆེན་པོ་ལ་དད་པའི་ཤུགས་དང། སྔར་མ་གསན་པའི་ཆོས་འགའ་ཞིག་གི་བཞེད་པ་དང། གཙོ་བོར་ནི་ཐུགས་གཡེང་