[A:418]བསྙེན་པར་རྫོགས་པ་དང། སེམས་བསྐྱེད་ཀྱི་ཆོ་གའི་སྲོལ་གཉིས་ལ་བརྟེན་ནས། བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང། མདོ་རྒྱུད་བསྟན་བཅོས་བླ་མ་སོ་སོའི་གསུང་འབུམ་གྱི་ལུང་ཙམ་ཉན་པ་ནི་བགྲངས་བ་ལས་འདས་ཤིང། དེ་དག་གིས་ཀྱང་རང་རང་སོ་སོའི་གནས་སུ་བློ་ནུས་དང་འཚམས་པར་སྡོམ་རྒྱུད་དང་ལུང་རྒྱུན་འཛིན་པ་ནི་མངོན་སུམ་དང་ལྐོག་ཏུ་གྱུར་པར་ཤིན་ཏུ་མང་པོ་དག་ཡོད་པར་ངེས་ཤིང། རྒྱུ་དུས་ཀྱི་དབང་གི་ཆོ་གས་ཡོངས་སུ་སྨིན་པར་གྱུར་ནས། ཁྲིད་ཕྲན་སོ་སོ་བ་དག་གི་བརྒྱུད་པ་འཛིན་པ་ལྟ་ཅི་སྨོས། གསུང་ངག་རིན་པོ་ཆེ་ཚར་དེ་ཙམ་ཞིག་གསུངས་པ་ལའང། སློབ་མའི་གྲངས་ནི་ཕལ་ཆེར་བརྒྱ་ཙམ་ལས་ལྷག་པར་ངེས་པ་ལ་གསུངས་ཤིང། ཉན་པ་པོ་དེ་དག་གིས། བོད་དང་བོད་ཆེན་གྱི་ཡུལ་ཁམས་སོ་སོ་བ་རྣམས་སུ། མ་མཐའ་ཐུན་བཞི་ཚུན་ཆད་ཀྱི་རྣལ་འབྱོར་ལ་བརྩོན་པར་བྱེད་ཅིང། རང་རང་གི་བློ་ནུས་དང་ཕན་སེམས་དང་འཚམས་པར། སློབ་མ་དང་ཉིང་སློབ་ཏུ་གྱུར་པ་དག་ལ་བརྒྱུད་པ་འཛིན་དུ་འཇུག་པར་ངེས་པས་སོ༎
དཔེར་ན་དབུས་གཙང་གི་དགོན་ཕྲན་སོ་སོ་བའི་བླ་མ་དང། བཤད་ཉན་པ་དང། དབོན་པོ་དང། ཡིད་རབ་ཏུ་གཞུངས་པ་གཞན་ཡང་མང་པོ་དག་ལྟ་ཅི་སྨོས། ཤྲཱི་ནཱ་ལེནྟྲ་རྐྱང་པའི་ཉན་བཤད་པ་དུས་དེར་གསུང་ངག་གསན་པ་རྣམས་ཀྱིས་དེང་སང་ཡང་གསུང་ངག་གི་བརྒྱུད་པ་བཟུང་ཞིང། ཟླ་དུས་ཀྱི་མཆོད་པ་འབུལ་བར་མངོན་སུམ་གྱིས་གྲུབ་པ་བཞིན་ནོ༎
3.3
དེ་ནས་མཐར་ཕྱིན་པའི་དུས་ཀྱི་མཛད་པ་ལ། 3.3.1
ངོ་མཚར་ཅན་དངོས་དང། 3.3.2
རྗེས་ཀྱི་མཛད་པ་རྣམས་ཇི་ལྟར་གྲུབ་པའོ༎
3.3.1
དང་པོ་ནི། སླར་ཡང་ཆོས་རྗེ་གུང་རུ་གཤེགས་རྗེས་སུ། ཤྲཱི་ནཱ་ལེནྟྲའི་གཙུག་ལག་ཁང་གི་ཁྱམས་ཆེན་པོར་གསུང་ངག་རིན་པོ་ཆེ་ཡོངས་སུ་རྫོགས་པར་གསུངས་པ་གྲུབ་པའི་ཉིན། མཆོད་གཏོར་རྒྱ་ཆེན་པོ་བཤམས། ཚོགས་པ་ལ་དགའ་སྟོན་དང་རྣམ་བཞག་མཛད། མེ་ཏོག་གི་ཆར་ཆེན་པོ་བབས། བཀའ་ཞལ་