[A:417]སྤྱོད་ཆར་བཞིན་དུ་བབ་པ་རྣམས། སྤྱིར་བླ་མ་དང་དཀོན་མཆོག་གི་མཆོད་པ། ཆོས་འབྲེལ་ཞུས་པ་རྣམས་ལ་ཟླ་དུས་ཀྱི་མཆོད་འབུལ། བསྟན་པའི་གསལ་བྱེད་དུ་གྱུར་པའི་འཆད་ཉན་པ་རྣམས་ལ་གནང་སྦྱིན། བློ་གསལ་བའི་དོན་གཉེར་བ་རྣམས་ལ་བསྔོ་བགྲངས་དུ་མ་ཕྱག་ལེན་མཛད་ཅིང། ཁྱད་པར་དུ་བཅུ་བཞིའི་དུས་ཆེན་སྔར་སྲོལ་ལས་རྒྱ་དཔངས་བསྟོད་པ་དང་བདེ་དགྱེས་གསང་གསུམ་གྱི་དཀྱིལ་འཁོར་བཞེངས་ནས། གསང་སྔགས་འཛིན་པ་བརྒྱ་ལྷག་ཙམ་གྱིས་བསྒྲུབ་མཆོད། ཞག་སྦྲེལ་དུ་མཛད་པ་སོགས་ཀྱི་སྲོལ་ཚུགས་པར་མཛད་དོ༎
གདན་ས་དེར་གདན་ཆགས་རིང་ལ་དུས་བདེ་ཞིང། འཁྲུག་པ་མེད། གྲྭ་རྒྱུན་དང་ལོངས་སྤྱོད་ཀྱི་ཚོགས་རྒྱས་ཤིང། དམ་པའི་ཆོས་འཕེལ་བར་མཛད། འབྲུག་གི་ལོ་vc: 1472ལ་ཆོས་རྗེ་གུང་རུ་བའི་ཕྱག་ཏུ་གདན་ས་གཏད། གཟིམས་ཁང་ན་སྔར་མེད་ཀྱི་ཐབ་ཆས་དང་གདན་ཆ་སོགས། གདན་ས་ན་རིམ་གྱིས་རྒྱུན་ལ་ཕན་པའི་དགོངས་པ་མཛད། དེ་ནས་ཀྱང་ལོ་ལྔའི་བར་དུ་བཤད་བསྒྲུབ་སྤེལ་མར་མཛད་དེ། མདོར་ན་གསུང་ངག་རིན་པོ་ཆེ་རྐྱང་པའང་ཚར་ཉི་ཤུ་རྩ་གསུམ་ཙམ་གསུངས་པར་གྲགས་སོ༎
3.2
གཉིས་པ་རྒྱུད་འཛིན་གྱི་སློབ་མ་ཇི་ལྟར་བྱུང་བ་ནི། གོང་དུ་ཇི་སྐད་སྨོས་པ་དེ་ལྟར་ཆོས་ཀྱི་རྣམ་གྲངས་གསུངས་པ་རྣམས་ཉན་ནས་རང་གི་རྒྱུད་སྨིན་པར་བྱས་པའི་སློབ་མ་འཇིག་རྟེན་ཕལ་བ་གྲངས་ལས་འདས་པ་རྣམས་ལྟ་ཅི་སྨོས། རྒྱལ་བའི་བསྟན་པ་ལ་ལེགས་པར་རབ་ཏུ་བྱུང་ནས། ལྟ་བས་བཀར་བཏགས་པ་བཞི་དང། སྤྱོད་པས་བཀར་བཏགས་པས་རྒྱུད་ཡོངས་སུ་སྨིན་པར་བྱས་པའི་སློབ་མ་ནི་འབུམ་ཕྲག་གི་གྲངས་ལས་ཀྱང་བརྒལ་བར་མངོན་ཏེ། ཐོག་མ་རྒྱལ་ལྷ་ཁང་གི་མཁན་པོར་ཕེབས་པ་ནས་བཟུང་ནས། དགོངས་པ་ཡོངས་སུ་རྫོགས་པ་དེ་སྲིད་ཀྱི་བར་ལ་བསྒྲུབ་བྱ་གཞན་དག། དགེ་བསྙེན་དང། བསྙེན་གནས་དང། རབ་ཏུ་བྱུང་བ་དང། དགེ་ཚུལ་དང།