[A:397]དངོས་པོ་རྣམས་ཀྱིས་རང་གི་འཚང༎
གསལ་བར་སྨྲས་པ་ཇི་བཞིན་ནོ༎
དེ་ཡང་སོ་སོར་སྡུདབསྡུད་པ་དང། བསམ་གཏན་གྱི་མཐུ་ལ་བརྟེན་ནས་ལྟ་བའི་ཕུ་ཐག་ལེགས་པར་ཆོད་དེ་དངོས་པོ་རྣམས་ཀྱིས་རང་གི་རང་བཞིན་ཀུན་རྫོབ་སྣ་ཚོགས་སུ་སྣང་ཞིང་དོན་དམ་པར་རང་བཞིན་མེད་པ་ཉིད་དེ་ཉིད་ཀྱིས་གསལ་པོར་སྨྲས་པ་བཞིན་དུ་བདག་མེད་རྟོགས་པའི་ཤེས་རབ་ཀྱིས་ཆོས་ཀུན་སྒྱུ་མ་ལྟ་བུར་རྟོགས་ཤིང། སྤྱན་དང་མངོན་པར་ཤེས་པ་ཐོགས་མེད་དུ་ཤར་ཏེ་ཡུལ་ལྗོངས་འདིར་མཆིས་པ་རྣམས་ཀྱི་དགེ་བ་དང་མི་དགེ་བའི་མཚན་མ་དང་སེམས་ཅན་རྣམས་ཀྱི་འཆི་འཕོ་བ་དང་སྐྱེ་བ་དང་རང་ཉིད་ཀྱི་སྔོན་གྱི་གནས་དང། ཕྱི་མའི་གནས་དང། ཡབ་དང་ཡུམ་གྱི་ཕྱི་མའི་གནས་ཇི་ལྟ་བ་བཞིན་དུ་མཁྱེན་ཏེ། དགེ་ལེགས་ཀྱི་མཛད་པ་བསམ་གྱིས་མི་ཁྱབ་པ་བསྐྲུན་ཅིང་ལུང་སྟོན་པར་མཛད་པ་ཡིན་ནོ༎
དེའི་ཚེ་ཉི་ཟླའི་རྒྱུ་བ་ཀུན༎
དབུ་མའི་ལམ་དུ་རབ་ཕྲོགས་ནས༎
དེ་ཉིད་འཛིན་པའི་རྣལ་འབྱོར་གྱིས༎
ལོངས་སྐུའི་ཞིང་ཁམས་བརྒྱ་ཕྲག་བགྲོད༎
འདི་ལྟར་ང་དྲུག་རྐང་བཅས་ཀྱིས་དམན་པའི་ལས་རླུང་ཉི་ཁྲི་ཆིག་སྟོང་དྲུག་བརྒྱའི་འཕོ་བ་བཅུ་གཉིས་པོ་ཐམས་ཅད་དབུ་མའི་ལམ་དུ་ཕྲོགས་ནས་དེ་ཉིད་གཞན་དུ་མི་འགྱུར་བའི་བདེ་བ་ཆེན་པོར་འཛིན་པར་ནུས་པའི་རྣལ་འབྱོར་གྱིས་བདེན་དོན་རྣམ་པ་བཅུ་གཉིས་ཀྱི་དོན་མངོན་སུམ་དུ་མཛད་དེ། དེ་ཉིད་ཀྱི་ངང་ནས་རྒྱལ་བ་ལོངས་སྤྱོད་རྫོགས་སྐུའི་ཞིང་ཁམས་བརྒྱ་ཕྲག་རྣམས་སུ་བགྲོད་ནས། ཟབ་པ་དང། རྒྱ་ཆེ་བའི་ཐེག་པ་ཆེན་པོའི་ཆོས་ལ་ལོངས་སྤྱོད་པར་མཛད་པ་ནི་བསམ་གྱིས་མི་ཁྱབ་སྟེ། འོན་ཀྱང།
འདི་ན་སྐལ་བ་དམན་པ་འགའ༎
སྦྱངས་པའི་མཐུ་དང་གོམས་པའི་རྩལ༎
གང་ཡང་མེད་པར་རང་བློའི་དཔེས༎
གཞན་བློ་དཔོག་ཕྱིར་བཏང་སྙོམས་བཞག༎
ཅེས་སྨྲས་ཏེ། འདིར་ནི་རྒྱས་པར་མ་བརྗོད་དེ། ལ་ལ་རང་ལ་སྦྱངས་པ་དང་ཉམས་སུ་མྱོང་བ་ཅི་ཡང་མེད་པར་རང་རྒྱུ་མཚན་དུ་བྱས་ནས་གཞན་