[A:392]པ་སང་ཤེས་པའི་དྲུང་དུ། རྡོ་རྗེ་གུར་དང། རྡོ་རྗེ་མཁའ་འགྲོ་མ་ལ་སོགས་པ་གསན་ནོ༎
དེ་དག་ནི་མཐའ་ཆོད་པར་གསན་ཅིང་སློབ་གཉེར་ཡོངས་སུ་རྫོགས་པར་མཛད་པ་དག་ཡིན་ནོ༎
གཞན་ཡང་བླ་མ་སོ་སོ་ལ་ཆོས་གསན་པ་ནི་བསམ་གྱིས་མི་ཁྱབ་སྟེ། རྒྱས་པར་གསན་ཡིག་ལས་ཤེས་སོ༎
2.2.1.2.3
གསུམ་པ་མན་ངག་ཐུགས་ཉམས་སུ་བཞེས་པའི་ཚུལ་ལ༎
གང་ངོ་བང་མཛོད་ནོར་གྱིས་ཏེ༎
ཁྱོད་ཐུགས་མན་ངག་དུ་མས་སོ༎
ཞེས་སྨྲས་ཏེ། དེ་ཡང་དགུང་ལོ་བཅུ་གཅིག་པའི་དུས་སུ༎ རིན་པོ་ཆེ་བསོད་ནམས་སེང་གེའི་དྲུང་དུ། དུས་ཀྱི་འཁོར་ལོའི་དབང་གིས་རྒྱུད་ཡོངས་སུ་སྨིན་པར་མཛད་ནས། སྦྱོར་བ་ཡན་ལག་དྲུག་ཁྲིད་ཆ་ལག་དང་བཅས་པ་སྔོན་གོམས་པའི་དབང་གིས་འབད་རྩོལ་མེད་པར་ཐུགས་ཉམས་སུ་བཞེས་པ་ལ་བརྟེན་ནས། སོ་སོར་བསྡུས་པའི་མཐུས་གཟུང་འཛིན་གཉིས་སུ་སྣང་བའི་རྣམ་པར་རྟོག་པ་ཐམས་ཅད་འགགས་ཤིང་དུ་བ་ནས་རེ་ཁཱ་ནག་པོའི་བར་གྱི་རྟགས་རྣམས་མངོན་དུ་ཤར་ཏེ་དེ་ཉིད་ཀྱི་བསམ་གཏན་གྱི་མཐུས་མི་གཡོ་བར་མཉམ་པར་བཞག་པས། ཁམས་གསུམ་ལ་འདོད་ཆགས་དང་བྲལ་བར་གྱུར་ཏོ༎
འོན་ཀྱང་དེའི་ཚེ་ན་ཇི་སྙེད་པའི་སྣང་ཚུལ་དེ་དག་ལ་སྒྱུར་འཛིན་གྱི་རྣམ་པར་རྟོག་པ་ཕྲ་མོ་མ་བྲལ་བར་སྣང་ངོ་ཞེས་གསུང་ངོ༎
དེ་ཉིད་ཀྱི་ཚེ་ན། སྲོག་རྩོལ་གྱི་མཐུས?མཐུ་ལས་རླུང་སེམས་བདེ་བ་ཆེན་པོར་འདྲེས་པས་རྩ་དབུ་མའི་མདུད་པ་རང་སར་གྲོལ་ཏེ། ཕྱི་ནང་གི་ཆོས་ཐམས་ཅད་ལ་ཐོགས་པ་མེད་པའི་བློ་གྲོས་ཐོབ་པ་ཡིན་ནོ༎
དེར་མ་ཟད་སྔོན་དང་ཕྱི་མའི་གནས་མཐོང་བ་དང། ད་ལྟར་གྱི་གནས་སྐབས་སུ་ཡང་ཡུལ་ཁམས་གང་ན་ཇི་ལྟར་ཡོད་པའི་ཚུལ་ཐམས་ཅད་མུན་ཁང་གི་ནང་དེ་ཉིད་ནས་གསལ་བར་གཟིགས་ཏེ། དཔེར་ན་ཉིད་ཀྱི་གཅེན་པོས་གྲོ་སའི་ཆོས་གྲྭར་ཉིད་ཀྱི་སྐུ་ཆོས་བསྣམས་པ་མཐོང་བས་དེ་ལ་སེར་སྣའི་རྣམ་པར་རྟོག་པ་ཅུང་ཟད་སྐྱེས་སོ་ཞེས་གསུང་བ་བཞིན་ནོ༎
ཡང་བླ་མ་གྲོ་ས་པ་མཁས་བཙུན་པའི་དྲུང་དུ།