[A:375]ཇི་ཙམ་རེག་པའི་རྒྱ་ཁྱོན་དང་མཉམཔྙམ་པ་འཇའ་ཚོན་གྱི་རི་མོ་གསལ་བར་དོད་པ་དང། ཡང་རྒྱུན་མའི་བཞུགས་གདན་དེ་ལས་བཞེངས་པའི་ཚེ་རྟག་ཏུ་ཕྱག་གིས་འཇུ་བའི་ཀ་བ་ཅིག་བཞུགས་གདན་གྱི་གཡས་ཟུར་ཡོད་པ་དེ་ལ། ཕྱག་གཡས་པའི་སོར་མོ་བཞིའི་རྗེས་གསལ་བར་དོད་པ་རྣམས་སོ༎
དེ་དག་ནི་རང་གི་མངོན་སུམ་གྱིས་གྲུབ་པ་དང། སློབ་དཔོན་མཁས་པའི་དབང་པོ་རྗེ་ཉིད་ཀྱི་ཞབས་རྡུལ་ཡུན་རིང་དུ་བསྟེན་པའི་སྐྱེས་བུ་དམ་པ་རྣམས་ཀྱི་གསུང་ལས་ཐོས་པ་དང། གཞན་ཡང་ཡིད་ཆེས་པའི་མཆེད་པོ་དམ་པར་གྱུར་པ་རྗེ་ཉིད་ཀྱི་ཉེ་གནས་ཆེན་མོ་སློབ་དཔོན་ནམ་མཁའ་དཔལ་ལྡན་པའི་གསུང་ལས་ཐོས་པ་རྣམས་ཀྱང་ཕྱོགས་གཅིག་ཏུ་བསྒྲིགས་ཏེ་གསལ་བར་བྲིས་པ་ཡིན་ནོ༎
མགོན་ཁྱོད་ངེས་པར་ཡང་དག་རྫོགས་སངས་རྒྱས༎
ལ་ལར་དག་པའི་སར་བཞུགས་སེམས་དཔའི་ཚུལ༎
གཞན་དུ་སོ་སྐྱེའི་སློབ་དཔོན་མཁས་པའི་སྐུར༎
སྟོན་མཛད་དགེ་བའི་བཤེས་ཁྱོད་ཕྱག་གི་གནས༎
ཤིང་རྟའི་སྲོལ་འབྱེད་པདྨའི་ངང་ཚུལ་ཉིད༎
གྲུབ་པའི་སར་བཞུགས་རྗེ་བཙུན་རྒྱ་གར་དང༎
འཆད་རྩོད་རྩོམ་མཁས་ཀུན་མཁྱེན་རོང་པོའི་ཞབས༎
ཐ་དད་གསུམ་མིན་ཐུགས་རྒྱུད་གཅིག་པའི་སྐུ༎
སྔོན་ཚེ་སྤྲུལ་པའི་ལོ་ཙ་རིན་ཆེན་མཆོག༎
བར་དུ་བཅོམ་ལྡན་རིགས་པའི་རལ་གྲིའི་ཞབས༎
ཐ་མར་སྨྲ་བའི་སེང་གེ་རོང་སྟོན་རྗེ༎
སོ་སོར་སྣང་ཡང་གསུང་རྒྱུན་གཅིག་པའི་སྐུ༎
བཅུ་ཕྲག་བརྒྱད་དང་གསུམ་གྱི་ལོར་བཞུགས་ནས༎
མཚན་ཉིད་ཐེག་པའི་གཞུང་ཚན་དྲུག་ཅུ་དང༎
དབང་དང་གདམས་པ་རྒྱུད་ཆེན་བཤད་པས༎
བསྟན་པའི་འཛིན་ཁྱོད་གངས་ཅན་མཁས་པའི་གཙོ༎
བུ་སློབ་བསྟན་པའི་ཀ་ཆེན་རྣམ་པ་བཞི༎