[A:360]ཞུས་པས། ཁོ་བོ་ལ་ན་བ་མི་ཡོང། ན་བ་མེད་པར་འཆི་བ་འོང། འཆི་བ་ལ་ཐུགས་དམ་གྱིས་ཟློག་པ་ཡང་ཡོད། མི་ཟློག་པ་ཡང་ཡོད། ཁོ་བོའི་སེམས་ནི་ནམ་མཁའ་འདྲ་ནམ་མཁའ་ཁྱོད་ཀྱི་སྐུ་མདོག་འདྲ། འདྲ་ལ་འདྲ་མིན་སྣ་ཚོགས་ཡོད། ཅེས་གསུང་ངོ༎
དེ་ནས་སློབ་དཔོན་ནམ་བསོད་ཆེན་མོ་དང། དཀའ་བཅུ་པ་ཤཱཀ་བཟང་དང། སློབ་དཔོན་བློ་རིན་དང། ནམ་མཁའ་སྙིང་པོ་རྣམས་ཀྱིས་གྲོས་བྱས་ནས་ཞུས་པ། དི་རིང་ཚེས་བཅུ་ཙམ་དུ་སླེབ། དགུན་ཆོས་ཀྱང་ཟླ་གཅིག་ལྷག་ཙམ་སོང། ད་ལོ་གཞན་ལས་ཆོས་འཕེལ་བར་བྱུང། མདང་དགོངས་ནས་རིགས་ལུང་ཡང་ཆག་བྱུང་བས། ངེད་རྣམས་ཀྱང་བཟད་ཆུ་ཤུལ་ལ་གནང་ཉིན་ཙམ་ཆོས་བར་ལ་ཐེགས་པ་ཡིན་ལགས་ཞུས་པས། སྤྱན་ཧུར་གྱིས་མཛད་ནས། ད་རུང་འགྲོ་མི་རན། ཚེས་བཅུབཅྭ་ལྔ་བར་དུ་སྡོད། ཆོས་མཇུག་འདི་ལ་ཚ་ར་དང། མང་ཇ་འུར་ཆིལ་ལེ་བ་འུར་ཆིལ་ལེ་བ་ཡོང། ངེད་རང་ཡང་ཚེས་བཅུ་བཞི་ལ་ཆོས་མཚམས་བྱེད་ཅེས་གསུངས། ཁོང་རྣམས་ཀྱིས་ཞུས་པས། མང་ཇ་གཅིག་ཙམ་ཨེ་ཡོད་ཡིན། འུར་ཆིལ་ལེ་བ་འོང་པའི་དོན་མེད། དྲུང་ནས་ཆོས་རྒྱུན་དུ་གསུང་བ་ལ་དགུན་ཆོས་ལ་ཆོས་མཚམས་ཀྱི་ལུགས་མེད་ལགས་པ། གྲྭ་པ་རྣམས་ཀྱི་ཆས་ཀ་ཡང་ཟད་འདུག་པས་ཅིས་ཀྱང་འགྲོ་ལགས་ཞུས་པས། ཨ་ཕོ་འོ་ན་ཞག་གསུམ་བཞུགས་དང། སྐད་ཆ་གསར་པ་འོང་ཉེན་ཡོད་དེ་ཅེས་གསུངས། དེ་ནས་ཚེས་བཅུ་གཉིས་ཀྱི་སྔ་དྲོ་ནམ་མཁའ་གཡའ་དག། མེ་ཏོག་གི་ཆར་ས་ལ་མ་བབ་ཀྱང་ནམ་མཁའ་ལ་ལྡིང། ཆོས་དུང་གཅིག་བུས་པས་སྐད་གཉིས་ཡོད་པ་འདྲ་ཅིག་བྱུང། དེའི་ཉིན་ཆོས་ཉན་གཞན་ལས་མང་བ་ཚོགས། དེ་ནས་གཟིམ་ཁང་གི་སྒོ་ཐོན་མ་ཐག་ཏུ་ཕྱག་འཁར་མཆན་ཁུང་གཡོན་དུ་བཅུག། ཁྱི་རྣམས་ལ་ཁྱི་ཟན་