[A:350]ཆེན་བཅུ་གསུམ་གྱི་ནང་ཚན་ཡིན་ནམ་ཡང་ཟེར་བའི་བྲག་དཀར་ཤར་ནུབ་ཅེས་བྱ་བ་ཡོད། དེ་གཉིས་ཀྱི་དབུས་ན་ཞི་བྱེད་ཀྱི་ཆོས་ལུགས་འཛིན་པའི་སྒོམ་ཆེན་པ་རོང་པོ་ཆོས་བཟང། ཞེས་བྱ་བས་བཏབ་པའི་དགོན་པ་བྱུང་ཟེར། དེ་དང་སྐད་ཐོས་ཀྱི་ས་ན། སྔོན་རྨ་རིན་ཆེན་མཆོག་ཅེས་བྱ་བའི་དགོན་པ་བྱུང་ཟེར། དེ་ལྟ་བུའི་ས་ཕྱོགས་དེ་བཞེད་པར་འདུག་ན་འབུལ་ལོ་ཞེས་ཞུས་པས། ཐུགས་ཤིན་དུ་དགྱེས། སྔོན་གྱི་ཐུགས་ཀྱི་བག་ཆགས་སད། ད་ལྟ་རང་འགྲོ་གསུང། ཤིང་མོ་ཡོས་ཀྱི་སྟོན་ཟླ་ཐ་ཆུང་གི་ཚེས་བརྒྱད་ལ་ས་ཆའི་གཟིགས་རྟོག་ལ་ཕེབས། གོལ་མ་ཞེས་བྱ་བའི་ལུང་པ་དེའི་དབུས་དྲང་པོ་ན་ནེའུ་གསིང་ཡིད་དུ་འོང་བ། ཆུ་མིག་མང་པོས་རྣམ་པར་བརྒྱན་པ། དེའི་དབུས་དྲང་པོ་ན་ས་ཅུང་ཟད་སྐམ་པ། འབུར་དུ་དོད་པ། དུང་དཀར་པོ་གཡས་སུ་འཁྱིལ་བའི་རྣམ་པ་ཅན་ཞིག་སྣང་ངོ༎
དེར་རྗེ་ཉིད་ཀྱིས་ཕྱག་འཁར་གྱིས་གཙུགས་ནས་འཁྱིལ་གྱི་ཐད་དེར་འདིར་ཆོས་ཁྲི་མཛད་དོ་གསུང་གིན་ཡོད་པའི་ཚེ། དེའི་ཕུ་ན་རྒྱུན་དུ་ཡོད་པའི་སྒོམ་ཆེན་པ་རྡོ་རྗེ་བཀྲ་ཤིས་ཞེས་བྱ་བ། ཤིན་དུ་བཟང་པོ་ཞིག་ཡོད་པ་དེས། ནས་དང། འབྲས་དང། དོ་ལོ་དང། སྔོ་ནེ་དང། གཞན་ཡང་རིན་པོ་ཆེ་སྣ་ལྔ་བདར་བའི་ཕྱེ་མ་འདྲེས་ཡོད་དོ་ཟེར་པའི་སྡེར་མ་གང་ཕུལ། ན་ནིང་ཁོ་བོའི་རྨི་ལམ་ན། ལུང་པ་འདི་ཐམས་ཅད་མེ་ཏོག་གིས་གང་བར་རྨིས། མདང་སུམགསུམ་གྱི་རྨི་ལམ་ན་ད་ལྟ་ཕྱག་འཁར་གཙུགས་པའི་ཐད་འདི་ན། བྱ་རྒོད་སྤུངས་པའི་རི་ཡིན་ཟེར་བའི་ཆོས་ཁྲི་གཅིག་འདུག། དེ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་མང་པོས་མེ་ཏོག་འཐོར་བ་རྨི་ལགས་ཟེར་བ་ཞུས་པས། ཁྱེད་ཀྱི་མིང་ལ་ཅི་ཟེར། རྡོ་རྗེ་བཀྲ་ཤིས་ཟེར་བ་ལགས་ཞུས་པས། རྟེན་འབྲེལ་བཟང་གསུངས།