[A:345]གིས་དེ་འདྲའི་ཁྱབ་པ་མ་བཅས་པས་དངོས་འགལ་དུ་མ་སོང་ཞེས་ཟེར། རྗེ་ཉིད་ཀྱི་ཞལ་ནས། ཁྱེད་ཀྱིས་མི་ཤེས་དཀའ་བཅུ་པ་ཁོང་རང་ལ་དྲིས་ཤིག་ཅེས་གསུངས་པས། དཀའ་བཅུ་པ་ན་རེ་སོང་སོང་ཅེས་གསུངས། དེའི་དུས་ཀྱི་རྩོད་གཞི་ནི། རྗེ་ཉིད་ཀྱིས་རིགས་པས་དཔྱད་པའི་ཚེ། ཚད་མ་དང་གཞལ་བྱ་དོན་དམ་དུ་མ་གྲུབ་པར་ཞལ་གྱིས་བཞེས་པ་ལས། དར་མས། དོན་དམ་དུ་ཚད་མས་དམིགས་པ་མ་གྲུབ་པའི་ཕྱིར། ཅེས་འཕངས་ནས་འཁོར་གསུམ་ཀ་སྒྲིགས་པ་ལས། རྟགས་ཀྱི་སྒྲིག་མཚམས་རིགས་པས་ཤིན་ཏུ་དཔྱད་པའི་ཚེ་ཚད་མ་དང་གཞལ་བྱ་དོན་དམ་དུ་མ་གྲུབ་པ་བུད། ཅེས་པ་ཡིན་ལ། དེ་ནས་བགྲོ་གླེང་མང་པོ་སོང་བའི་རྗེས་སུ། བདག་ཉིད་ཆེན་པོས། རིགས་པས་ཤིན་དུ་དཔྱད་པའི་ཚེ་ཚད་མ་དང་གཞལ་བྱ་དོན་དམ་དུ་གྲུབ་པར་ཐལ། དོན་དམ་དུ་ཚད་མས་དམིགས་པ་གྲུབ་པའི་ཕྱིར། ཞེས་འཕངས་པ་ལ་ཁྱབ་པ་མ་གྲུབ་ཀྱི་ལན་བཏབ་པར་རྩོད་ཡིག་ལས་བཤད་དོ༎
ཡང་ཐེག་ཆེན་ཆོས་ཀྱི་རྒྱལ་པོ་གོང་ལ་ཕྱིརཔྱིར་ཐེགས་པའི་ཚེ། འཕན་ཡུལ་ཨཱ་ཧཱུཾ་གདོང་གི་ན་མོ་ཆེར་དགས་པོ་དཀའ་བཅུ་པ་འོད་ཟེར་སེང་གེ་དང། དབུ་མའི་རྩོད་པ་བྱས་པས། དགས་པོ་ན་རེ། མྱུ་གུ་དེ་བདེན་པ་གཉིས་ཆར་དུ་ཡོད་མེད་ལ་སོགས་པའི་མཐའ་བཞི་དང་བྲལ་བ་ཡིན་ནོ་ཞེས་ཟེར། དེ་ལ། བདག་ཉིད་ཆེན་པོས། མྱུ་གུ་ཆོས་ཅན། ཀུན་རྫོབ་ཏུ་ཡོད་པར་ཐལ། ཀུན་རྫོབ་ཏུ་མེད་པ་མ་ཡིན་པའི་ཕྱིར། འཁོར་གསུམ་དངོས་འགལ་ལོ་ཞེས་གསུངས་པ་ལ། དགས་པོས་ཁྱབ་པ་མེད་དོ༎ མྱུ་གུ་སོགས་པའི་ཆོས་ཅན་ཇི་སྙེད་པ་རྣམས་ཀུན་རྫོབ་ཏུ་ཡོད་པར་ཁས་ལེན་ཅིང། མེད་པར་ཁས་མི་ལེན་པ་དེ་ནི། རིགས་པའི་རྣམ་གཞག་མི་བྱེད་པ་དེའི་ཚེ་ཡིན་ལ། རྒོལ་ཕྱིར་རྒོལ་སོ་སོར་བཤམས་ནས་རིགས་པའི་རྣམ་གཞག་བྱེད་པ་དེའི་ཚེ་ནི། ཡོད་མེད་ལ་