[A:329]གྱི་དཀའ་འགྲེལ་བརྩམས་པའི་ཚེ། མཁན་ཆེན་རིན་པོ་ཆེ་དགའ་ལྡན་གྱི་གནས་ནས་བྱོན་པ་ཡིན་གསུང་ནས། ཐུགས་དགྱེས་པོ་མཛད། དཀའ་འགྲེལ་གནས་འདིར་ཚར་བ་གྱིས་ཤིག་གསུང། དེ་ནས་དེའི་ཞབས་ལ་ཕྱག་བྱས། བདག་ཀྱང་དགའ་ལྡན་གནས་སུ་འགྲོ་བ་ལགས་ཤེས་ཞུས། རྗེས་ལ་ཤོག་ཅེས་གསུང་བ་སྙམ་བྱེད་པའི་མཚན་ལམ་བྱུང། དེའི་ཕྱི་ཉིན་ཤིན་དུ་དགྱེས། སློབ་མ་རྣམས་ལ་མང་ཇ་གནང། མཁན་ཆེན་རིན་པོ་ཆེའི་སྐུ་འདྲ་གསེར་ཤོག་གིས་སྤྲས་པ་ཞིག་སྒ་བ་གདོང་གི་གཙུག་ལག་ཁང་དུ་བཞེངས་སོ་ཞེས་ཡིད་ཆེས་པའི་སློབ་དཔོན་གྱི་གསུང་ལས་ཐོས་སོ༎
སྤྱིར་ནི་བདག་ཉིད་ཆེན་པོ་འདིས་ནི་གུ་ནས་གསུངས་པའི་རྨི་ལམ་འབྱོངས། རྨི་ལམ་མངོན་ཤེས་དང་འདྲ་བར་ལུང་སྟོན། སློབ་མ་དག་གིས་བྱ་བ་དང་བྱ་བ་མ་ཡིན་པའི་རྣམ་དབྱེ་ཞུས་པ་ན། གྲལ་དེ་ཉིད་དུ་མནལ་གཟིམ་པ་ལྟར་བྱེད། དེ་ལས་བཞེངས་མ་ཐག་ཏུ་ལུང་སྟོན། ཡང་ཕྱི་དྲོའི་ཆོས་གསུངས་པའི་སྐབས་སུ་བབ་པ་ན། མང་པོ་ཚོགས་པའི་གྲལ་ཡིན་ཀྱང་གྲལ་དེ་ཉིད་དུ་མནལ་མཛད། དེའི་ངང་ལ་ཐུགས་དཔྱོད་དང་གཟིགས་རྟོག་མཛད། དེ་ལས་བཞེངས་མ་ཐག་ཏུ་ཆོས་དུང་བུས་ཤིག་ཅེས་གསུང་བ་ཕལ་ཆེར་མཛད་ཀྱིན་འདུག་པ་ནི་མངོན་སུམ་གྱིས་གྲུབ་པོ༎
ཡང་མཁན་ཆེན་རིན་པོ་ཆེ་ལ་རྗེས་འབྲངས་གཉིས་དང་བཅས་ཏེ་བདེ་བ་ཅན་གྱི་ཞིང་ཁམས་སུ་བྱོན་པའི་སྣང་བ་ཤར་བའི་དུས་ཀྱི་རྗེས་འབྲངས་གཅིག་ནི་བདག་ཉིད་ཆེན་པོ་འདི་ཡིན་པར་ཀུན་ལ་གྲགས་སོ༎
ཡང་རྗེ་བཙུན་རེ་མདའ་བ་མངའ་རིས་གུང་ཐང་དུ་བཞུགས་པའི་དུས་ཀྱི་མཚན་ལམ་དུ། དགའ་ལྡན་ན་རྗེ་བཙུན་བྱམས་པའི་གཡས་ཕྱོགས་ན་ཁྲི་མཐོ་བ་གསུམ་བཤམས། གཡོན་ཕྱོགས་ན་དེ་ལས་ཅུང་དམའ་བ་ཡིན་ནམ་སྙམ་པ་གསུམ་བཤམས་པ་མཐོང་ངོ༎ དེའི་ཚེ་གཡས་