[A:༥༩༤]དགོས་གསུངས་པ་བཟློག་ཀྱང༌། དེའི་གླེང་བསླང་བྱུང་གི་དོགས་ནས་དབྱར་དང་སྟོན་གཉིས་ཕྱི་བ་ཁུང་སོགས་ཀྱི་ལུང་སྟོང་དུ་གཅིག་པུར་གཞུགས་ནས་ཐུགས་དམ་མཛད། དགུན་རྫིང་ལུང་དུ་བཞུགས་པས། གླང་ལོའི་དཔྱིད་མཁན་ཆེན་སངས་བློ་བས་ཅིས་ཀྱང་གྲྭ་ཚང་གི་བཤད་ཉན་གྱིས། མི་ཀུན་ཁྱོད་བསྟེན་མ་ཤེས་ཞེས་ང་ལ་འཐབ་ཏུ་འོང་བར་འདུག་གསུངས་པ་ལ། འདོད་བཞེད་མེད་པའི་རྒྱུ་མཚན་ཞུས་ནས། གླང་ལོའི་མཇུག་ཏུ་ལྷ་སར་བྱོན། སྟག་ལོའི་ཆོ་འཕྲུལ་ཆེན་པོ་ལ་ཕྱག་དང་བསྐོར་བ་ལ་སོགས་བསགས་སྦྱངས་ཀྱི་རྣལ་འབྱོར་མཛད། དེ་ནས་ཉན་སྟོང་དུ་ཆོས་རྗེ་རྒྱལ་མཆོག་པ་བཞུགས་པའི་དྲུང་དུ་བྱོན་ཏེ། མཁན་པོ་གཞུང་ལུགས་རབ་འབྱམས་སྨྲ་བའི་བཤེས་གཉེན་གངས་ཅན་ཀུན་དགའ་དཔལ། ལས་ཀྱི་སློབ་དཔོན་དོན་རིན་པ། གསང་སྟེ་སྟོན་པ་ཆོས་རྗེ་རྒྱལ་ཚབ་པ། ཆོས་རྗེ་རྒྱལ་མཆོག་པ་རྣམས་ལ་སོགས་པ་དད་པའི་དགེ་འདུན་ཉི་ཤུ་རྩ་གསུམ་གྱི་དབུས་སུ་སོ་ལྔ་པ་ཆུ་ཕོ་སྟག་གི་ལོ་ཨ་མི་ཡོལ་དུ་བསྙེན་པར་རྫོགས་པར་མཛད་དོ། །དེ་ནས་བོ་དོང་བར་ཆོས་རྗེ་རྒྱལ་མཆོག་པའི་ཆག་ཕྱི་མཛད་ནས། མུས་སུ་བྱོན་ཏེ། སོ་དྲུག་པ་ཡོས་ལོ་ལ་མུས་སུ་བཞུགས་པའི་ཚེ། ཤོག་བུ་ཚལ་དུ་བླ་མ་ནམ་ཆོས་པ་བདེ་བར་གཤེགས་པའི་ནུབ་མོ། རྗེ་འདིའི་མནལ་ལམ་དུ། བླ་མ་ནམ་ཆོས་པ་བདེ་བ་ཅན་དུ་གཤེགས། ཁྱོད་ཀྱང་དེ་ནས་ལོ་བཞི་བཅུ་ཞེ་གཉིས་ན་བདེ་བ་ཅན་དུ་འགྲོ་བ་ཡོད་ཅེས་ཟེར་བ་ཅིག་བྱུང་གསུང་ངོ༌། །དེའི་སྟོན་ཆོས་རྗེ་རྒྱལ་མཆོག་པ་ཆུ་འདུས་སུ་བཞུགས་པས། བཤད་ཉན་ལ་ཤོག་གསུངས་པའི་ཕོ་ཉ་ཕྱག་རྟགས་དང་བཅས་པ་ཕེབས། བཤད་ཉན་མི་བྱེད་ཀྱང༌། དེའི་རྒྱུ་མཚན་དང༌། ས་སྐྱར་བཀའ་ལུང་ཞུ་རུ་འགྲོ་བའི་ཞལ་ད་ཞུ་བ་ལ་དེ་མ་ཐག་བྱོན་པས། ཆོས་རྗེ་དགེས་ནས། སྡེ་དེའི་རིགས་བཟང་བ་དང༌། ནོར་ཕྱུག་པའི་གྲྭ་པ་སྤྲོད་པ་དང༌། འཇིག་རྟེན་གྱི་ཟང་ཟིང་མང་པོ་འོང་བའི་ཞལ་ད་གནང་གིན་འདུག་ཀྱང༌། ཐུགས་ལ་འཕྲོད་པ་ཙམ་མ་བྱུང་བར། སྔར་ངམ་རིངས་སུ་སློབ་དཔོན་སངས་བློ་བ་ལ་རིགས་