[A:69]rgya mtsho ste gzhad srags gnyis dang / zong mchog chos skyong dang 'tshur shes rab mchog gnyis te zong 'tshur gnyis dang bcu byung / 'tshur la mi bcus sdom pa blangs zhes bshad de/ de rnams dpon bi yig cha ltar bris zhes zer ro/ gang na'ang dbus gtsang na bstan pa med pa'i tshe yang / shar mdo khams su dbus gtsang nas bros pa'i dge ba'i bshes gnyen dag gis bstan pa'i bya ba cung zhig byas par sems so/
gnyis pa bstan pa'i srol btod pa ni/ dpal 'khor btsan gyi sras bkra shis brtsegs pa dpal dang / skyid lde nyi ma mgon gnyis stod smad du so sor gyes tsam gyi sku ring la/ lcags bya nas lo brgya dang brgyad 'das pa'i dgu pa sa mo bya'i lo nas brtsams te/ dbus gtsang mi bcus/ gtsug lag khang so sor brtsigs/ rab tu byung ba'i dge 'dun gyi sde gsar du btsugs pa ni/ bstan pa phyi dar gyi srol btod pa ste/ de yang sa mo bya'i lo klu mes kyis/ la mngor (mor) gyel gyi gtsug lag khang brtsigs/ de'i phyi lo glan ye shes 'bar dang / rngog byang chub 'byung gnas sogs rab tu byung / de'i phyi lo yer pa ba reng bzung / gru mer tshul khrims 'byung gnas sogs bco brgyad rab tu byung / glan rngog gru mer/ sna rnam rdo rje dbang phyug dang bzhi la klu mes kyi slob ma ka ba bzhir grags/ klu mes kyi slob bu rnams kyi'ang gtsug lag khang so sor brtsigs te/ sna rnam rdo rje dbang phyug gis rgyal lugs lhas/ rngog byang chub 'byung gnas kyis gzhu kun dga' ra ba/ gru mer sogs bande mi phyed dang brgyad kyi sol nag thang po che/ gra pa mngon shes kyis gra thang brtsigs so/