[A:54] dam chos shin tu dar te skyid pa'i rabs/ zhib tu rtsis na khri srong lde btsan byon nas/ ral pa can gshegs pa'i lcags mo bya'i bar la lo brgya dang bcu gnyis 'byung ngo zhes bshad par bya'o/ de bas na/ bstan pa sngar dar gyi me mo lug nas/ ral pa can gshegs pa'i snga lo lcags pho sprel lo yan la lo bzhi brgya dang so bzhi yod pas/ dus gsal rtsa bar/ snga dar bzhi brgya so bzhi bzhugs zhes bshad pa legs mod/ de yang spyir btang ba yin gyi dmigs kyis bsal na/ dbu brnyes pa'i me mo lug nas/ srong btsan sgam po'i lo bcu gnyis pa so pho byi ba yan gyi lo nyis brgya dang nyi shu rtsa gnyis ni gnyan po gsang ba la mchod pa tsam las/ bshad nyan sgom sgrub ma byung la/ srong btsan sgam po rgyal sar thon pa'i sa mo glang nas lcags pho sprel lo'i bar lo nyis brgya dang bcu gnyis tsam zhig bstan pa snga dar gyi dngos gzhi la byung ba yin no snyam du sems so/
gnyis pa bshes gnyen bsten tshul ni/ rgyal po khri srong lde btsan gyi ngo la/ zhi 'tsho/ kA ma la shI la/ bi ma la mi tra/ pad 'byung / sangs rgyas gsang ba/ shAnati garabha/ sngags 'chang dharma kirti/ kha che dza na mi tra/ dA na shI la sogs dang / bod kyi lo tsA ba sad mi bdun/ sad mi bdun las blo sbyangs pa dpal rtsegs sogs lo tsA ba brgya rtsa brgyad/ de dag las blo sbyangs pa klu'i rgyal mtshan sogs lo tsA ba stong rtsa brgyad sogs mang du byon pa las/ khyad par bka' drin che ba ni/ mkhan po bo dhi sa twa/ u rgyan padma/ kA ma la shI la/ bod kyi lo tsA ba bai ro tsa na rnams yin la/ khri ral pa can gyi ngo la ni/ bod kyi lo tsA ba/ ka ba dpal brtsegs dang / cog ro klu'i