[A:169] la 'phags pa dang mjal/ mi res pus mo la babs yon tan slob gsungs/ bcu dgu pa la 'phags pa zhi bar gshegs/ nyer gcig pa la gong la byon/ snyan sgra'i (dgra'i) stabs kyis so lnga pa'i bar sman tshe'i yul
'byon dgos pa shar/ ti shri grags 'od khu dbon gyis legs pa'i mtshams sbyar/ so drug pa la 'phags pa ti shri'i dbon po yin nges su 'dug pas gdung rgyud spel dgos kyi rgyal po'i lung bud/ so bdun pa sa pho khyi la sa skyar phebs/ chos dang 'jig rten gyi 'byor pas gdan sa bskyangs/ re gsum pa shing pho byi ba la zhi bar gshegs so/
'di nyid la sras kun dril bco lnga tsam zhig byon par snang yang / yongs grags sras dgu ni/ ti shri kun blo yab so brgyad pa sa mo phag la byon bcu gcig pa la ti shri thob/ nyer bzhi pa khyi lo bod du bsnyen rdzogs la byon/ nyer drug pa la yab gshegs/ sku mched rnams la bla brang so sor bgos/ nyer dgu la gong du gshegs zer/
mkhas btsun pa sku mched la bzhi thog bla brang pa zhes zer te/ mkhas btsun nam mkha' legs pa yab zhe bzhi pa sbrul lor bltams/ so dgu la gshegs/
gcung gu shri nam mkha' rgyal mtshan yab gshegs pa'i byi lo'am/ yang na chu mo byi lo pa chos rje bla ma dang dgung mnyam yin zer/ nyer gsum pa la gshegs so/
ti shri kun dga' legs 'byung sku mched la lha khang bla brang pa zer te/ gcen ti shri kun dga' legs 'byung yab zhe bdun pa sa pho sprel lor byon/