[A:130] zab mo'i bka' drin nod de/ rang lo so gnyis pa chu mo yos bu'i lo sgrub pa'i lung sbyin/ ngo mtshar ba'i rdzu 'phrul gyi ltad mo bstan/ rang lo zhe bdun pa sa pho rta'i lo/ rnal 'byor gyi dbang phyug grub chen bi ru pa gtso 'khor lnga/ chos sgo skyel du byon te/ spyir rgyud sde bdun bcu rtsa gnyis kyi man ngag/ khyad par lcags ri mi 'da' ba'i zab chos bzhi la sogs te/ mdor na gsung ngag nye brgyud kyi gnad zab mo'i bdud rtsi ngom par gsol/ rang lo lnga bcu pa lcags mo bya'i lo zhang gi gdams pa'i lo bco brgyad bka' rgya yang grol te/ mdo khams kyi khams pa a seng gis zhus pa'i ngor gsung ngag thog mar bka' stsal/ gzhung bshad a seng mar grags pa yi ger bkod/ rgyud man ngag zab mo'i bdud rtsi spel/ sku'i bkod pa mi 'dra ba drug bstan/ slar re bdun pa sa pho stag la dbyug pa zla ba'i tshes bcu bzhi la sku 'bum rnam rgyal du grags par chos dbyings su gshegs/ bde ba can/ po ta la/ u rgyan/ byang gser mdog can bzhi na sku'i bkod pa bzhis skal ldan gyi don mdzad cing da lta yang bzhugs skad/
phag mo gru pa'i rnam thar na bde ba can/ byang a yu ta ra/ gser mdog can gsum na sku'i bkod pa gsum bstan te bzhugs/ 'di rang ngo mtshar che gsung skad do/
slob ma'i mchog ni/ sing ga gling gi rnal 'byor pa/ byang chub sems dpa' stag/ sgom pa skyi 'bar te mchog thob gsum/
rje btsun chen po/ zhus (zhu) byas dngos grub/ dga' ston rdo rje grags/ sgom pa 'od zer grags/ nags sgom pa bsod nams rgyal mtshan/