[A:49]nub pa dang / de bzhin du jo bo rje dang / rngog lo tsA ba la sogs pa 'das pa na lo nyes pa dang mi ngas chen po byung bar thos la/ rje sa skya pa chen po nyid 'das pa na yang de bzhin du gyur to zhes grags te/ 'di ltar 'byung ba'i rgyu mtshan yang / gang zag dam pa de 'jig rten du byon pa na/ de'i bsod nams kyis 'jig rten thams cad bde bar 'tsho zhing / gzhan du gshegs pa na 'jig rten 'dir mi dge ba 'byung ba chos nyid yin pa'i phyir ro/ /de nas sku yol ba'i dgun phyi ma byi ba'i lo rgyal gyi zla ba la/ sde snod 'dzin pa shAkya'i dge slong kun dga' rgyal mtshan dpal bzang po la sogs pa chos las skyes pa'i sras rnams kyis lag len byas nas phyogs ris kyi slob mar gyur pa'i dge ba'i bshes gnyen dang / slob bzhin pa'i grwa pa rnams dang / yon bdag dang 'khor du gtogs pa rnams kyis ma bkral bar rang rang gi bdog pa thams cad mchod pa'i phyir phul te/ 'ga' zhig gis khri tsho dbul btab/ de bzhin du stong phrag lnga dang / bzhi dang / gsum la sogs pa nas/ lnga brgya dang / bzhi brgya dang / sum brgya dang brgya dang tha mas kyang bcu las mi nyung ba phul lo/ /de nas phyogs ris kyi dge ba'i bshes gnyen rnams spyan drangs nas/ sde snod mtha' dag gsung pa'i chos kyi 'khor lo chen po btsugs te yo byad rgya chen pos 'tsher 'grib med par bag yangs su spyod cig ces pa'i bsgo nas zad len du phul te/ sde snod rin po che gsum la 'chad pa dang rtsod pa'i grwa chen po btsugs nas bde bar gshegs pa'i bstan pa la bya ba rgya chen po byas so/ /de nas rgyal gyi zla ba zad la khad pa na/ gtsug lag khang chen po rnams dang / dge ba'i bshes gnyen rnams dang / dge 'dun stong phrag bdun las mi nyung ba rnams la chos kyi 'khor lo rin po che bskor ba'i yon phul te/ de yang