[A:47]gyis de dag 'khod par gyur to/ /der rje btsun nyid la gsol ba btab pa na/ rje btsun nyid kyang gshegs pa la spro bar snang ngo / /der des dang po byang phyogs kyi 'jig rten gyi khams gser mdog can du gshegs so zhes gsungs pa dang mi 'gal lam zhes zhus pas/ de lta mod kyis gsar du spyad pa'i las khyad par can 'ga' zhig gis thog mar bde ba can du 'gro zhes gsungs nas de'i rjes la khyod kyang bde ba can gyi bkod pa la ltos shig gsungs nas phyag gis brda sprad pa na des kyang mthong ste rin po che'i shing ljon pa dang / baiDUrya'i sa gzhi la sogs pa bkod pa chen po yid 'phrog par snang ngo / /de nas rnam thar 'ga' zhig gsung ba la sad pa na brjed/ de la drung na yod pa'i dge slong zhig na re/ ngas khyed dngos su mthong ba las gnyid du song ba zer mod kyis/ 'on kyang rmi lam yin par de nyid kyis shes so/ /de'i tshe nyid kyis mchod pa'i phrin las kyang mdzad/ yan lag bdun pa sngon du 'gro bas de bzhin gshegs pa'i dkyil 'khor gyi 'khor lo bsgom pa'i ting nge 'dzin rgya chen po yang mngon du mdzad nas/ zhabs drung na 'khod pa 'ga' zhig la/ re zhig kho bo bde ba can gyi zhing du 'gro bar 'dug /de nas yun ha cang yang mi ring ba zhig bde ba can du bsdad nas byang phyogs kyi 'jig rten gyi khams gser mdog can du sngar bshad pa'i tshul gyis 'khor los sgyur ba'i cha byad du byas nas sangs rgyas kyi zhing yongs su sbyong bar byed/ de nas skye ba gsum pa'i lus de la brten nas/ lus de ma spang par phyag rgya chen po mchog gi dngos grub thob tu re ba yin zhes gsung ngo / /de nas gsang sngags kyi rten cing 'brel bar 'byung ba zab mo 'ga' zhig la thugs rtse gcig tu mdzad de/ bde ba can du gshegs par gyur to/ /de la bdag