[A:470]por gyur to/ /deng sang tshogs bshad pa rnams bar do sogs kyi 'khrid glegs bam dngos bstan la med ces blor mi shong yang 'jam mgon sa paN gyis/ 'on kyang rten 'brel zab mo'i gnad/ /da dung kun gyis rtogs par dka'/ /glegs bam tsam la brten pa yi/ /lam 'bras pas kyang 'di mi shes/ /zhes glegs bam la ma brten pa'i snyan brgyud yod pa ma go ba'i skyon yin la/ gal te tshe 'dir ma grol zhing 'da' kha ma yang gnad du ma song ba'i rigs la bar dor 'o brgyal nges par 'byung bas/ dbang po rab la'ang ltos sa ltos 'jog gi rab 'bring tha gsum 'byung bas rtsi lugs shes dgos shing 'khor 'das dbyer med la bshad lung yam me ba las ma byung bas sa skya pa'i dge bshes chen por rloms te sems ngo sprod par phyag chen yam zhig zhu zer nas rtogs ldan blun po skyabs 'gro'i gnad tsam yang mi shes pa zhig la thal mo sbyar nas bsten pas zhabs la thag pa 'dogs pa mang zhing / dbang bzhi'i dmigs rim yang 'khor 'das dbyer med dang gdan gsum tshang ba'i gnad don ngo ma 'phrod pas chag med rnams bshar sbyang tsam gyi kha ton lci ba dang / bshad pa rgya chen po las nyams len gyi snying po med par go nas da gzod nyams len byed rgyu gzhan nas 'tshol ba skad byed pa'i rang mtshang mang po nyi ma dang sbar mo'i dpe bzhin kun gyis mthong ba ltar yin la/ slob bshad 'di nyid tshul ldan zhig thob na dbang po 'bring yan chad la tshe gcig lus gcig la 'tshang rgya bar nus pa'i chos gsungs pa de 'di yin pa 'dug /