[A:308]slar yang 'chi bdag 'joms pa'i cho 'phrul 'di/ /bdag sogs rgyal ba gzhan gyis mi thul ba'i/ /skal dman 'ga' la dgongs te bzhugs sam snyam/ /yang dgung lo zhe bzhi pa'i tshe zla ba gcig na 'chi zer ba'i lung bstan cig byung gsung / de bzlog pa'i slad du skyid spug bla brang du sku mtshams la bzhugs nas sbyor drug pa'i lugs kyi yi ge la dmigs pa'i rdo rje bzlas pa zhag bdun mdzad pas mnal lam gyi tshul du 'chi bdag gi bdud yin zer ba'i ban rgan dug hrul gyon pa'i gzugs brnyan zhig drung na 'dug pa la dbyug pa zhig bsnun pas cung zad tsam yang ma lus pa thal bar bun gyis song ba zhig byung gsung ste/ de ltar snyigs ma'i 'gro ba rnams la brtse bas dgongs te sku tshe'i 'du byed yang dang yang du byin gyis brlabs pa yin no/ /de bzhin du nga byis pa'i dus su dbang bskur ba zhu ba'i tshe bla mas ji ltar brda sprad pa'i dmigs pa las sems gzhan du gtan nas yengs mi 'gro ba zhig yod gsung ba dang / ngas lo bzhi lnga tsam lon pa'i dus chos rje sangs rgyas rgyal mtshan pa'i drung du tshe dpag med dze tA ri'i dbang zhus ba'i tshe/ 'jug pa'i phyag gi skabs su 'dod snam gyi steng na phar skor ba byas phyin pa gsal po zhig dran gsung ba la dpags na/ dbang gang dang gang gsan pa de'i ye shes kyi dkyil 'khor sgrib med du gzigs kyi yod par snang zhing / des na/ dbang dus nyid nas 'jug pa sel ba'i lam/ /mngon du gyur pa'i skya rengs 'dis mtshon nas/ /rim gnyis dkyil 'khor shar tshe mtshan rtog gi /mun pa ma lus sel bar smos ci dgos/ /zhes bsngags pa'ang don la gnas pa nyid yin no/ /