[A:277] dpal rdo rje nag po chen po lcam dral/ lha brgyad zhal bzhi pa/ rnam sras bya sder lugs/ dmag zor re ma tI rnams kyi rjes su gnang ba/ bod du 'gyur ro cog rgyud sde rin po che rnams phyogs gcig tu sgrigs pa rgyud 'bum du grags pa'i lung / theg pa chen po blo sbyong gi myong khrid/ khrid yig 'gro mgon dpal yis mdzad pa sogs mdor na bla ma 'di la mnga' ba'i yon tan thams cad bum pa gang byo'i tshul du mdzad cing / gsang sngags kyi bshad pa dang phyag len la bla ma 'di rang sku drin che ba yin gsung ngo / /gzhan yang thub pa'i dbang pos mdo sde du ma las gsal bar lung bstan pa'i kun mkhyen dol po pa zhes grags pa de nyid kha ba'i ljongs 'dir zab lam gyi bstan pa spel ba'i slad du bsam bzhin du skye ba bzhes te/ sku 'bum mthong grol chen po'i chos 'khor gser zangs su bsgyur ba sogs nyid kyi 'phrin las kyi lhag ma rnams rgyas par mdzad pa'i bdag nyid jo nang mkhan rin po che kun mkhyen nam mkha' chos skyong las snga phyir dpal dus kyi 'khor lo'i rdul tshon dang ras bris kyi dkyil 'khor du bsod nams kyi tshogs kyi slad du byis pa'i 'jug pa'i dbang bdun/ tshul khrims kyi tshogs kyi slad du 'jig rten pa'i dbang bzhi/ ye shes kyi tshogs kyi slad du 'jig rten las 'das pa'i dbang bzhi pa rnams sngon du 'gro ba'i rgyud thams cad kyi nges pa'i don sbyor ba yan lag drug pa myong khrid du gsan pas rnam pa thams cad kyi mchog dang ldan pa'i stong pa nyid mngon du gyur/ mchog tu mi 'gyur ba'i bde ba chen po la mnga' brnyes te nges pa'i don gyi dpal dus kyi 'khor lo mngon du mdzad/ zab lam gyi khrid yig sngon 'gro thog