[A:375]bya 'dul ba'i 'dren pa de/ /chos dbyings gdod ma'i dbyings su mya ngan 'das/ /kyi hud gru chen zhig pa'i tshong pa bzhin/ /mgon med srid mtshor lhung ba'i nyam thag rnams/ /bor nas gdod ma'i dbyings su ngal bso ba/ /kye ma ho thugs rje'i ded dpon gang du song / /chos rgyal dag pa'i dbyings su gshegs gyur pas/ /gsung rab blon po khros nas gsung mi 'byin/ /gdul bya'i skye bo 'dul ba'i skyon med khrims/ /ljongs 'dir nub par 'gyur la the tshom med/ /sa bcu'i dbang pos brten pa'i 'khrul med lam/ /nges don dus kyi 'khor lo yid bzhin nor/ /bshad sgrub rgyal mtshan rtse nas lhung ba'i mthus/ /gdul bya'i re ba 'gengs pa'i nus pa nyams/ /dam pa'i nyin byed nub rir son ma thag /skyon med bstan pa'i phyogs kun mun par song / /'gro ba'i bde skyid padmo kha zum zhing / /nag phyogs 'byung po'i bya rnams gad mo 'byin/ /kye hud gtam ngan 'di 'dra ma thos la/ /bla ma'i zhal bzang mig gis mthong bzhin du/ /'chi ba'i gnas skabs thob pa'i skal med bdag /grangs med sdig pa'i 'bras bus smin par nges/ /kyi hud 'di 'dra'i gnas skabs mthong na yang / /dum bur mi gas snying 'di rdo rjer nges/ /da dung za nyal 'chag pa'i bsam pa can/ /mi lus dud 'gro'i sems las gzhan ci zhig /bde ba can dang rin chen snang ba sogs/ /sngon chad bzhugs pa'i gnas su phyin pa na/ /bzhugs gdan tsam yang snang bar ma gyur pas/ /mya ngan me lce'i bud shing lhag par 'phel/ /yul phyogs gzi nyams phyogs kun