[A:354]rje nyid kyis rdo rje'i slob dpon mdzad nas dpon slob rnams kyis rdul tshon gyi dkyil 'khor la brten pa'i sgrub mchod zhag bdun pa zhig mdzad pa'i dkyil 'khor dang rnal 'byor pa rnams mchod cing bsnyen bkur ba'i yo byad thams cad shin tu phun sum tshogs pa phyag nyid nas gnang / de'i phyi lo'ang sgrub mchod zhag bdun pa zhig mdzad pa'i bsnyen bkur ba thams cad ma tshang ba med pa sde pa gnas gsar nas kyis bsgrubs/ de nas bzung ste lo re bzhin gzhir bzhugs kyi sgrub chen thams cad 'tshogs pa'i sgrub mchod rdul tshon la brten pa zhag gsum re 'chag med du mdzad pa'i gzhi brten la/ sa bre'i nas khal brgya tham pa chos kyi rje rgyal tshab dam pa dpon slob rnams kyi phyag tu bzhag ste/ sgrub mchod 'chag med dang / gzhi rkyen log 'tshor mi 'gro ba'i bka' bkod kyang mdzad de/ bdag chen rdo rje 'chang yab sras kyi dgongs pa rdzogs pa'i thabs kho na la dmigs pa yin mod/ da ni de dang de yi dbang las nam mkha'i 'ja' tshon ltar gyur te ci zhig bya/ de'ang sgrub mchod 'di'i yi ge ni sgrub thabs chos kyi rgyal po 'phags pa'i gsung ji lta ba dang / dkyil chog bla ma sante pa'i gzhung gi don/ zar byang phug pas mdzad pa nyid gnyan lotstsha ba'i bshad srol sa lugs 'dres med yin gsung / bdag chen rdo rje 'chang yab sras thugs gtsigs su mdzad par 'dug pas/ yi ge de nyid la lhan thabs shig mdzad kyang yod pa de dag gi thog nas yin/ chos rje thams cad mkhyen pa bu ston gyis mdzad pa'i sgrub dkyil rnams kyi brgyud pa du ma'i man ngag phyogs gcig tu mdzad cing brgyud pa yang so so la 'ded par snang / mkhas pa kha cig